Nukissiorfinni soraarsitsisut
Landskarsimiit tapiissutit ilanngarneqarmata Nukissiorfinni sulisut ikilisarneqartariaqalersut Namminersorlutik Oqartussat nukissiuteqarnermut suliffeqarfiutaat nalunaarpoq.
Sipaarniarneq pissutigalugu sulisut qulit soraarsinneqassapput. Taakku saniatigut atorfiit arlallit inuttaleqqinneqassanngillat. Tamanna pivoq ingerlatsinermut Namminersorlutik Oqartussat tapiissutaat 2012-mi 10 millioner koruuninik ilanngarneqarmata.
Politikkikkuttaaq aalajangiunneqarpoq ukiuni missingersuusiorfiuni 2013-mi, 2014-mi aamma 2015-mi 10 millioner koruuninik tapiissutit ikilineqassasut.
- Nukissiorfiit ernianut nalikilliliinernullu annertusiartuinnarmik nanerneqarput, erniaannaat eqqarsaatigigaanni 2012-mi 50 millioner koruuninik annertunerulersussaallutik. Tamanna tunngavigalugu Nukissiorfiit 2012-mi aningaasatigut missingersuummi 18,7 millioner koruunit ileqqaarutigissavaat, Nukissiorfiit pisortaat Henrik Estrup nalunaarpoq.
Nukissiorfiit ilanngullugu nalunaarutigaat qullersaqarfimmi soraarsitseqqinnissaq naatsorsuutigineqanngitsoq. Maanna misissorneqarput soraarsinneqartut ilaat Namminersorlutik Oqartussat allaffeqarfianni sulilersinneqarsinnaanersut.
Nukissiorfinni soraarsitsiortorneq annerusumik tusarsinnaavat radioaviisimi aamma Qanoruumi.
