Nukissiorfinni qarasaasiatigut viruseqarmat 15 tiimi qarasaasiat matoqqapput
Gribskov aamma Nordfyns kommune hackerinut allagaatinik 34.000-inik annaasaqarsimapput. Danmarkimi kommunini pinerluttuniit allagaatinik takusaqaqqissappata aningaasanik piumasaqarfigisanit marluk taakku ilaapput. Filit taakku parnaaqqapput, atorneqarsinnaanatillu, allagaatillu ammarneqassappata hackerit kisimik ammaasinnaapput.
Marlunngormallu KNR-miit oqaluttuaraarput, Namminersorlutik oqartussani akileraartarnermullu aqutsiveqarfimmi naatsorsuutit matuneqarallarsimasut. Taannali ajornartorsiut qaangiutereersoq Dorthe Bøge Sørensenip, nunatsinni digitalinngortitsinermut aqutsisoqarfimmi pisortaq oqarpoq.
Taakkuli nunatsinni kisimiillutik virussi maluginngilaat. Nukissiorfiit virusimik aamma eqqugaapput, IT-mik suliaqartartoq Kaali Fencker oqarpoq.
- Soraaliivilluta ataaseq, greennet emailimigut ammartoorsimagamiuk. Taamaalilluni filigut parnaarsuleramik, kisianni ingerlaannaq malugigatsigu, serverit ingerlaannaq qamiteratsigit. Taamaalilluta annikitsuararsuarmik eqqugaalluta, Kaali Fencker oqarpoq.
Taamaakkaluartoq Kaali Fenckeri qarasaasialerisoqataalu unnumut ataatsip marlup eqqaata tungaanut sulipput aqaguanilu ullaaq ilanngullugu ajornartorsiutip aaqqinnissaata tungaanut. Aatsaat taassuma kingorna nukissiorffimmi sulisut qarasaasiatik atoqqissinnaalerpaat.
-IT system eqqugaasut tamaasa qamiteriarlugit taanna virusi piiarlugu. Piiareeratsigit aatsaat ikeqqissinnaallugit, taamatut ingerlavugut. 15 tiimingajak makkua systemit maani pigisagut atorneqarsinnaanngillat, kisianni massakkut tamarmik ajoquteqanngillat aaqqereernikuupput, Kaali Fencker Nukissiorfinni qarasaasialerisoq taama oqarpoq.