Nukissiorfinni pisortaasimasoq peqquserlussimanerarpoq

Nukissiorfiit Uummannami immikkoortoqarfianni ingerlatsinermi pisortasimasoq, peqquserlussimasutut imminullu paarititanik 1,7 millionit koruuninik nalilinnik tillittutut unnerluutigineqartoq, pisimasuutitat arlaannut ataatsimut pisuusutut nassuerpoq. Nuummi eqqartuussivimmi sapaatit akunneri marluk qangiuppata sassartinneqarnissani sioqqullugu tassa nassuerpoq.
aggustip 16-at 2011 11:26

Angut 45-nik ukiulik Nukissiorfiit aqqa atorlugu pisiassanik imminukartussanik inniminniisarsimasutut unnerluutigineqarpoq, taamaalilluni pisiat suliffimminut akilertittarlugit. Taanna suliffeqarfillu Danmarkimiittoq, pisianillu tigooraasuullunilu ingerlatitseqqiisarsimasoq, peqquserlussimasutut unnerluutigineqarput. Taakku tamarmik Nuummi eqqartuussivimmut takkuttussaapput, tassalu ingerlatsinermi pisortasimasoq pisuunerminik nassuereersimavoq.

Suliffeqarfik alla, pisianik ilumuunngitsunik Danmarkimiit Nunatsinnut nassiussuisartuusimasoq, aamma unnerluutigineqartunut ilaavoq, suliassarlu taanna Nordjyllandimi politiinit suliarineqarpoq.

Ingerlatsinermi pisortasimasoq aamma imminut paarititanik tillissimasutut unnerluutigineqarpoq, maskiinat atorluarsinnaasut atortullu allat igitassaanerarlugit Danmarkimut nassiussimagamigit. Igitassaaneragai suliffeqarfiup allap Danmarkimiittup nittartakkakkut tuniniartarsimavai.

Angutip nassuerutigisimavaa, ilumut taama pisoqartarsimasoq, kisiannili ilumut igitassaasut aalajangiusimallugu.

Tamanna Nuummi Eqqartuussiviup aalajangissavaa. Eqqartuussivimmi septembarip aallartilaarnerani aalajangiisoqassasoq naatsorsuutigineqarpoq.