Nukissiorfimmi soraarsitsiortortoqassaaq

Nuummi Nukissiorfiit qullersaqarfiani misigissutsitigut ullumikkut nanertisimaarneqarpoq, sulisunimmi arlalinnik ullumikkut soraarsitsiortortoqartussaavoq.

Sulisulli qassit soraarsinneqarnersut suliffeqarfiup pisortatigoortumik aqagu aatsaat nalunaarutigissavaa.

Soraarsitaasussat Nukissiorfiit pisortaasa ullumikkut kalerriortortussaavaat.

Attaveqartarnermi nalunaaruteqartartup, Inga Dora Gudmondsdottir Markussenip ilisimatitsissutigaa, sipaarniarneq pillugu soraarsitsiortornermi qitiusumik allaffeqarfimmi sulisut kisimik eqqorneqassasut.

Nukissiorfimmi taama soraarsitsiortortoqartariaqarpoq Nukissiorfiit piginnittuanit sipaarniartoqarlunilu pisariillisaasoqartariaqartoq Namminersornerullutik Oqartussanit piumasarineqarmat.

Allanngortiterineq assigiimmillu akeqartitsilerneq Nukissiorfimmut ilaatigut aningaasartuutaangaatsiarsimavoq -

taamaalillunilu 10 procenti tikillugu aningaasartuutinut sipaartoqartariaqalersimalluni.

Nukissiorfik katillugit 430-t tikillugit sulisoqarpoq, taakkunannga 100-t qitiusumik allaffimmi sulisuullutik.

Nukissiorfiup pisortaa Svend Hardenberg ullaap tungaani attavigineqarsinnaasimanngilaq.