Nukissiorfimmi inuit 13-t soraarsinneqarput

aggustip 16-at 2006 10:42

Nuummi Nukissiorfiup qitiusumik allaffeqarfiani inuit 13-t qaammatip naanerani soraarsinneqarnissaannik ippassaq ilisimatinneqarput. Taamatuttaaq soraarsitsinerup saniatigut suliffiit aqqaneq-marluk atorunnaarsinneqarput. Taamatut aaqqiisoqarneranut Nukissiorfinni pisariillisaasoqartariaqarnera tunngavigineqartoq, Nukissiorfiup pisortaata Svend Hardenbergip oqaatigaa.

- Julip 20-iani suliffeqarfiup iluani tamanut ilisimatitsissutigineqarpoq, aqutsisut aalajangersimagaat suliffitsinni naammassiuminarsaasoqarnissaa pillugu pisariillisaasoqartussanngortoq, Nukissiorfiup pisortaa Svend Hardenberg oqarpoq.

Taanna nassuiaavoq niivernermi suleriaatsit, sullissinermi piffissat atorneqartartut, atuisunullu tunngasut pisariillisarneqartariaqarsimasut.

Svend Hardenberg aperaarput pisariillisaaneq atuisunut kingunilimmik malugineqarsinnaassanersoq.

- Aqutsisut taamatut aalajangiinerminni siunertaraat atuisut tamatuminnga ajortumik malugisaqannginnissaat.

Massakkorpiaq pingaarnertut sulissutigaarput atuisunut sullissinerup siuarsarneqarnissaa. Taamaattumik qularutiginngilluinnarpara una sulissutigisarput qaangiuteriarpat atuisut pitsaanerusumik sullinneqarsinnaalernissaat, Svend Hardenberg oqarpoq.

Taanna aperaarput taamatut pisariillisaasoqarnerani inuit 25-t amerlavallaarsorinannginnersut.

- Naamik, nutaamik periuseqalernitsigut inunnik 25-nik amerlavaallalerpugut, tassami siornatigornit allaanerusumik nutaamik maanna periuseqalertussanngoratta, Svend Hardenberg akivoq.

Taanna nangilluni nassuiaavoq taamatut aaqqiinermi suliffeqarfik tamarmi eqqorneqartoq immikkoortortaqarfiillu ataasiakkaat kisimik immikkut ittumik eqqorneqanngitsut.

Svend Hardenberg aperaarput, inuit soraarsinneqartut arlaatigut iliuuseqarfigineqassanersut.

- Aqqutisoqatigiiusugut tamannarpiaq immikkut assut oqaluuseraarput, inuillu eqqorneqartut ajunngitsumik ingerlaqqipallannissaat pingaartipparput. Neqeroorfigaagullu artornartorsiornermut oqaloqatiginninnissamut periarfissaqarnissaat tamatumalu saniatigut suliffittaarnissaannik aamma siunnersuinissamut periarfissiisinnaalluta. Taamatullu ikiueriaaseqarnitsinni immikkut ilinniarsimasunik pikkorilluartunik inunnik isumaginnittoqassaaq, Svend Hardenberg nassuiaavoq.

Svend Hardenberg aamma oqarpoq, qassinik sipaaruteqarumaarnertik maannakkorpiaq misissuiffigigamikku qanoq sipaaruteqarumaarnerminnik oqaaseqarsinnaanngikkallarluni.