Nukissiorfik nukimmik ataavartumik annertusaaniarpoq

Suliniut taaguuteqartinneqarpoq H2KT, matumanilu siunertaavoq nukissamik toqqorterinissamut teknologiimik atuineq takutinniarlugu misilittagaqarfigilerniarlugulu Nuummi brintiliorfimmik ikummatissaliorfimmillu pilersitsinissaq.

- Periaaseq batteriitut ingerlanneqassaaq, tassami nukik erngup nukinga atorlugu nukissiorfimmit pilersinneqartoq atorneqanngitsoq toqqorterneqassaaq, taamaalilluni illoqarfinni nunaqarfinnilu erngup nukissiuuteqanngitsuni atorneqarsinnaaniassammat. Suliniummut akisussaasoq Louise Johansson Nukissiorfimmeersoq taama nassuiaavoq.

Taassuma erseqqissarpaa taamaalilluni uuliamik solaarimillu pinngitsoorsinnaannginneq, taakkulu akiisa allanngorarnerannit eqqugaajuarneq minnerulissagaluartoq. Tamatuma saniatigut uuliamik gassimillu nukissiornermi CO2-mik mingutsitsineq minnerulersinneqassaaq.

Silap pissusaa pillugu isumaqatigiissummi maanna atuuttumi Nunattalu Kyotomi isumaqatigiissummut pisussaaffiinut tunngatillugu suliniut brintimut tunngasoq sunniuteqarnavianngilaq. Tassami CO2-mik mingutsitsinerup minnerulersinnissaanut piffissaliunneqartoq 2012-imut killeqarpoq, tamatumalu angunissaanut piffissaq sivikippallaartoq Louise Johanssonip oqaatigaa.

Brintiliorfiup ikummatissaliorfiullu Nummi qaqugu pilersinneqarsinnaanissaat Nukissiorfiit suli ullulerusunngilaat.

Maannakkut Nunatsinni pingasunik erngup nukiliorfeqarpoq, ataaserlu Sisimiut eqqaaniittoq naammassineqangalerpoq, Ilulissallu eqqaanni erngup nukinganik nukissiorfiliortoqarsinnaanera Inatsisartuni ukiamut oqaluuserineqassaaq.