Uummannami innuttaasut sapaatip akunnerani matumani akerliussutsimik takutitsipput. Taakku minguitsumik imeqannginnertik aalisakkeriviillu matoqqatinneqarnerat naammagilerpaat.Assi: Agnethe Nielsen Petersen

Nukissiorfiit sulinermi isertitassat annaasat pillugit: Illit sillimmasiisarfiit saaffigiuk

Nukissiorfiit Uummannami tiimimusiallit sillimmaserneqanngitsut aningaasarsiunngitsoornerannut taarsiissuteqarnavianngilaq. SIK-p tamanna oqartoornerinnaanissaa neriuutigaa.

Sillimmaserneqanngikkuit piffissamut suliffiginngisannut taarsiiffigineqassanngilatit.

Nukissiorfiit Uummannami aalisakkerivinni sulisunut, Uummannami erngup uuliamik mingutsinneqaqqanerani sulisinnaasimanngitsunut taama nalunaaruteqarpoq. Erngup mingutsinneqarnerat Nukissiorfiit nammineq pisuussutigaa.

AAMMA ATUARUK SIP Uummannaq: Sulisut aningaasarsiassaralui matussusersigit

Imaappa sulisinnaaasimanngitsut, assersuutigalugu tiimimusiallit taarsiiffiginavianngikkissi?

- Sillimmasiisarfigisap attaviginissaa taamaallaat innersuussutigisinnaavara, taakkulu uagut sillimmasiisarfipput attavigissavaat, Nukissiorfinni aqutsisoqarnermi allattoqarfimmi pisortaq, Sune Tougaard oqarpoq.

Imeq pillugu suliaq naatsumik:

- Septembarip 20-at: Uummannami imeq uuliamik mingutsinneqarsimasoq innuttaasut ilisimatinneqarput. Tamanna septembarip 11-anni pisimasoq, tassanilu Nukissiorfinni sulisup klori akuutissaq atornagu uulia akuleruttoorsimavaa.

 

- Innuttaasup piffissami tassani pasitsaassaqalerput, imermi uuliarsunnittoq naamaneqarsinnaammat.

 

- Nukissiorfinni sulisut imermut klorimik kuisigaangamik kiinarpaqartarput, taamaammat sulisup uulia kuigamiuk naamasinnaasimanagu, Nukissiorfiit ilisimatitsipput. Uulia klorilu assigiillutik akimut ersittumik qalipaateqarput.

 

- Uummannami aalisakkeriviit septembarip 19-iannili matoqqatinneqalerput.

 

- Meeqqat atuarfiat meeqqeriviillu aamma matoqqatinneqarnikuupput, maannali ammaqqinneqarsimallutik.

 

- Imeq minguitsoq imertartarfinnut pisillugu Uummannamut assartartorneqartarpoq, taamaalilluni innuttaasut namminneq imertartarlutik. Umiarsualivimmit nilaat aamma agguaanneqartarput.

 

- Imeqarfimmi imeq minguitsunngorsimasoq septembarip 29-anni nalunaarutigineqarpoq. Imeqarfimmiilli erngup akuerineqarnera Nukissiorfinnit aqaguani uterteqqinneqartariaqarluni.

 

- Imeq qaqugu imerneqaqqissinnaalissanersoq Nukissiorfinnit suli oqaatigineqarsinnaanngilaq.

Imaappa sillimmaserneqanngikkunik sulinngitsoornermi annaasatit pissarsiarisinnaanngikkaat?

- Nalulluinnarpara, sillimmasiisarfigisap attavigineqarnissaa taamaallaat innersuussutigisinnaavara, pisortaq oqarpoq. 

Taartisiassat pillugit illoqarfimmi innuttaasunut sisamanngormat ataatsimiititsinermi apeqquteqartoqarmat, aamma nukissiuuteqarnermut naalakkersuisoq, Jess Svane (S) Nukissiorfinnut innersuussivoq.

- Nammineq sillimmasiisarfiutigisap suliassamik Nukissiorfiit sillimmasiisarfianut suliassaq pillugu qulaajaasinnaasumik attaveqartoqassasoq Nukissiorfiit siunnersuutigaat, nukissiuteqarnermut naalakkersuisoq, Jess Svane (S) innuttaasunut sisamanngornermi ataatsimiititsinermi oqarpoq.

SIK: Assingusumik tusagaqanngisaannartoq

Taassuma Uummannami innuttaasut minguitsumik imeqanngitsut pakatsisimasut ataatsimeeqatigiartorsimavai. Innuttaasut sapaatini akunnerni marlunngulersuni minguitsumik imissaqanngillat, piffissallu ingerlanerani pakatsigaluttuinnarput.

- Pissutsit Naalakkersuisut ilungersunartutut isigaat. Nalinginnaasumik imermik pilersorneqannginneq unammillernarpoq ilungersunarlunilu, Jess Svane oqarpoq.

Sulisartut sillimmasiisarfimmut namminneq attaveqaqquneqarnerat ilaatigut aalisakkerivinni sulisunut aaqqissuussisartup SIK-p akuerinngilaa.

AAMMA ATUARUK Agnethe Uummannami: Naalakkersuisup tikinniarnera ajunngilaq – kingusinaarporli

Jess G. Berthelsen SIK-mi ukiuni 30-nngulersuni siulittaasuusoq assingusumik tusagaqarsimanngisaannarpoq:

- Aatsaavissuaq uanga tusarpara. (...) Taama oqariartortoqarsimappat sulisartut sillimmasiisarfiit attavigissagaat naamerluinnaq.

- Assorujussuaq eqqumiigaara, pissutigalugu siullermik, ilaasortavut taamatut sillimmasernissaminut akissaqanngillat. Aamma taanna nalinginnaasumik atortuunngilaq, tassa Danmarkimi A-kasseqarpoq, maani nunatsinni taamaattoqanngilaq. Taamaattumik eqqumiigilaarpara taamak oqariartortoqarsimassappat, SIK-p siulittaasua oqarpoq.

Siulittaasup Uummannami SIK-p immikkoortortaqarfia Nukissiorfinnut piumasaqaasiorsimanerarpaa, tassa SIK-mi ilaasortat erngup mingutsinneqarnerani sulisinnaasimanngitsut ulluni sulinngitsoorfimminni akissarsiaqartinneqartariaqartut.

- Nalinginnaasuunngilaq maani nunatsinni taamatut sillimmasertarneq, Jess G. Berthelsen oqarpoq.

Suliffeerunnermi ikiorsissutinik tigusaqarnissaq

Suliffeqarnermut Naalakkersuisoq, Erik Jensen tusagassiuutinut tallimanngornermi ualikkut nalunaaruteqarummini Nukissiorfiit Uummannami nalunaarutaannut erseqqissaavoq. 

Tassani allaqqavoq, aningaasarsiaqartartoq tunisassiornerup unitsinneqarnera pissutigalugu aningasarsiaqartinneqarani angerlartinneqaruni inatsisit malillugit suliffeerunnermi ikiorsiissutinik pisinnaatitaavoq, piumasaqaatit makkua naammassineqarsimappata:

- sapaatit akunneri kingulliit 13-it ingerlaneranni ikinnerpaamik nalunaaquttap akunnerini 182-ini sulisimagaanni.
- 18-inik ukioqalersimagaanni imaluunniit pilersuisuugaanni.
- Kalaallit Nunaanni inuit allattorsimaffiannut nalunaarsorsimagaanni.

Inuit angerlartinneqartut angerlartinneqarnermi ulloq siulleq suliffeerunnermi ikiorsiissutinik qinnuteqarniarlutik Majoriamut saaffiginneqquneqarput.

Allaatigisaq erseqqissarneqarluni oktobarip ulluisa tallimaanni nalunaaqutaq 15:57 nutarterneqarpoq. Taartissat pillugit innuttaasunut sisamanngormat ataatsimiititsinermi aperisoqarmat, Naalakkersuisut Nukissiorfinnik tapersersuisut allaqqagaluarpoq. Maanna allaqqavoq, Jess Svane Nukissiorfinnut innersuussisoq.

Allaaserisaq oktoberip arfine1q aappaani nal. 12.55 nutaamik toraarnerusumillu qulequtserparput

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat