Nukissiorfiit sinneqartooruteqarluarput

Kaaviiaartitat 2011-mut sanilliullugit 75 millionit koruuninik amerlipput, ilaatigut uuliap akitsorneratigut, 12 millionit koruunit tunisinerunermit pisuupput.

- Nukissiorfiit silap pissusianit sunnertiasorujussuupput. 2012-imi issilluarpoq, taamalu kiassarnermik atuineq qaffasilluni, pisortaaneq Henrik Estrup nassuiaavoq.

2012-imi aalajangersimasumik aningaasartuutit ukiumut siulianut naleqqiullugit 19,1 millionit koruuninik appariarput, ilaatigut sulisunut aningaasartuutit appartinnerisigut.

- Sulisuvut suliassanut nutaanut, aamma ingerlatseriaatsinut allanut, ikilisaanerup kingunerisaanik, sungiusartariaqarsimapput, tamannalu assut pikkorillutik ingerlappaat - Nukissiorfiit pisortaat erseqqissaavoq.

Nukissiorfiit sanaartukkanut malunnaateqarluartumik aningaasaliipput, pingaartumillu erngup nukinganik nukissiuutinik sanaartortitsinerup suliffeqarfiup aningaasaqarnera sunniuteqarfigisimavaa. 2012-imi sanaartornermut suliniutinut assigiinngitsunut 120-nut annerusunut mikinerusunulluunniit 416 millionit koruunit atorneqarput.

Nukissiorfiit 2012-imi innaallagissamik aamma kiassarnermik tunisassiaata 61 procentia erngup nukinganik nukissiorfinneersuuvoq. Kisitsit taanna 70 procentit missaannut qaffassasoq naatsorsuutigineqarpoq, tassa Ilulissani erngup nukinganik nukissiorfik ukioq kaajallallugu ingerlareersimaleriarpat.

Nukissiorfinni pisortat suliffeqarfimmi aningaasaqarnermik aqutsineq ukiormanna aamma qitiutinniarpaat, tamatumunnga ilutigitillugu pisortat qilanaaraat akigititat nutaat aaqqissuussaanerisa suliarineqarnerata nangeqqinnissaa.