Nukissiorfiit piginneqatigiiffinngussappat?

Kristian Jeremiassenip siunnersuutaata tunngavilersornera, Naalakkersuisut saqqummiussissutaannut assinguvoq.

Kristian Jeremiassenip siunnersuunni ilaatigut tunngavilersorpaa, Nukissiorfiit piginneqatigiilluni ingerlatsivinngortinneqarnerani, isorliunerusut nunaqarfiillu akitigut allannguiffigineqassanngimmata aamma Nunatta karsianiit aningaasaliissutigineqartartut allanngortinneqartussaanngitsut tunngavilersuutigaa aamma akit politikkikkut aalajangigassatut inissinneqartuaannarnissaat tunngavilersuutigalugu.

Nukissiorfiit piginneqataalersinneqarnerisigut pisortat aningaasaqarnerannut siunniuteqassasoq, Kristian Jeremiassenip aamma oqaatigaa, tassa ukiuini tulliuttuni pingasuni sisamaniluunniit aningaasat 400 million koruunit pisortanit iluanaarutigineqarsinnaammata. Tamassumunnga tunngavilersuutigaa, sanaartornermi atugassanik Nukissiorfiit aningaasanik Nunatta karsia avaqqullugu atorniartalernissaat.

- Ilutigalugu naapertuuppoq, Nukissiorfiit ingerlaavartumik aningaasaliinissaannut pilersaarusiortarnerat eqqarsaatigilluagaasumik pilersuinermullu ataatsimut isigalugu pisarnissaa, Aningaasanut Inatsip aningaasatigut inissisimasarneranut qilersorsimanngitsumik pisarnissaanut sanilliullugu, Kristian Jeremiassen allappoq.

Taanna aamma isumaqarpoq, Nukissiorfiit piginneqatigiiffinngortinneqarneratigut, akit mikinerpaat anguneqassasut .

- Assersuutissaqqinnerpaavoq Tele Greenland A/S-ip piginneqatigiilluni ingerlatsivinngortinneqarnerata kingunerisaanik, akiusut ingerlaavartumik appariartortinneqarsimanerat, Kristian Jeremiassen tunngavilersuivoq.

Nukissiorfiit illoqarfinni 17-ini nunaqarfinnilu 53-ini innaallagissamik, imermik kiassarnermillu tunisassiorlutillu tunisaqartarput.