Nukissiorfiit piginneqatigiiffinngortinnissaa piffissaasoraat
Nukissiorfiit aktianik piginneqatigiiffinngornissaa pillugu nalunaarusiaq aamma Nukissiuuteqarnerup siunissami qanoq aaqqissuunneqarnissaanut anguniagassatut pilersaarusiaagallartoq 2008-miit 2015-imut atuuttussaq, immikkut quppernerpassuarnik imalik naalakkersuisut suliarereerpaat.
Nukissiuuteqarnerup nutaamik aaqqissuunneqarnissaanut iliuusissat maannakkorpiaq suliffeqarfinnut kattuffinnullu tusarniaassutigalugit aallartereerput.
Nukissiorfiit aktianik piginneqatigiiffittut ingerlatilernissaa siornatigut piffissaasorineqarsimanngilaq. Maannali tassa piffissanngortoq, naalakkersuisut tusarniaanermut atatillugu nassuiaatiminni allapput.
Tunngavilersuutigaat piffissap matuma pitsaalluinnarnera, pingaartumik suliffeqarfiit nukissiuuteqarnermik atuisorujussuusussat eqqarsaatigalugit, assersuutigalugu taaneqarsinnaapput aluminiumik aatsitsiviliornissap aamma immap naqqagut kabeliliilluni kommunit killeqarfii akimorlugit innaallagissamik pilersuinerup piviusunngornissai sulissutigalugit aallartinneqareersut.
Nukissiorfiit aaqqissuussaanerat allanngortinneqassappat sapinngisamik innuttaasut aningaasatigut atukkamikkut artukkinneqassanngitsut nalunaarusiami erserpoq.
Nukissiorfiit piginneqatigiiffinngorunik, Namminersornerullutik Oqartussat tamakkiisumik pigisaattut imaluunniit piginneqataaffiattut ingerlanneqaleruni, immaqa kommunit aamma piginneqataatillugit, immikkut ittumik isumaqatigiissusiornikkut nunatta karsia Nukissiorfinnut tapiisariaqartarumaarpoq.
Innuttaasut illoqarfinniikkaluarunik nunaqarfinniikkaluarunilluunniit innaallagissamik, imermik kiassarnermillu atuinerat inuuniarnikkut eqqugaassanngitsoq qulakkeertariaqartoq, nalunaarusiami allaaserineqarpoq.
Soorlu assigiimmik akeqartitsinerup atorunnaarsinneranut atatillugu nunatta karsiata tapiisarnissaa isumaqatigiissutigineqarsimavoq.
Namminersornerullutik Oqartussat Nukissiorfiit ullumi ingerlappaat, aktianillu piginneqatigiilluni ingerlatseriaaseq atuutilerpat sapinngisamik amigartooruteqanngitsumik ingerlatsineq anguniarneqartussaavoq.
Nukissiorfiit ukioq kingulleq naatsorsuutaasa takutippaat, suliffeqarfik kommunini 17-ini nunaqarfinnilu 56-ini sullissiffiusunik 14-nik ingerlatalik siorna 27,4 millioni koruuninik amigartooruteqarsimasoq.
Nukissiiorfiit aktianik piginneqatigiiffinngornissaat ukiortaaq 2009-mi pisussatut takorloorneqarpoq, tassa kommunit 18-it atorunnaarsillugit kommunerujussuit sisamanngornerat 2009-mi januaarip aallaqqaatani pisussaq nalerorlugu.
