Nukissiorfiit piginneqatigiiffinngortinniarpaat
Innaallagiartornartunik angisuunik siunissami sanaartortoqasaaq. Alcoap Maniitsup eqqaani ukiuni qaninnerni aluminiuliorfiliornissaa naatsorsuutigineqarpoq, tamatumunngalu atatillugu erngup nukiganik innaallagissiorferujussuarmik sananissaq pilersaarutaavoq. Aammali immap naqqatigut innaallagissamut aqqusiisinnaanerup, Nukissiorfiit piginneqatigiiffinngortinnissaat pilerinarsisikkaat, Naalakkersuisut isumaqarput.
Naalakkersuisut siusinnerusukkut oqaatigereerpaat, inuussutisarsiornikkut pilersaarutit angisuut, Nunatta Karsiani sanaartornissamut immikkoortitat nungussinnaagaat. Nukissiorfiilli piginneqatigiiffingortinneqarpata, aningaasassarsiornerit ilaat tassunga suliakkiutigineqarsinnaapput.
- Piginneqatigiiffinngortitsinerup iluaqutissartaasa ilagaat, sanaartugassanut aningaasalersuinissaq isumagisinnaammagu, Inuussutissarsiornermut Pisortaqarfik Inatsisartunut nassuiaammini allappoq.
Kommunit allanngortinnissaannut atatillugu Aaqqissuussaanermut Isumalioqatigiissitat inassutiginikuuaat, innaallagissamut, imermut kiassanermullu kiisalu aqqusinernik qulleqartitsinermut akisussaaffik kommuninut nutaanut tunniunneqassasoq. Kisianni Naalakkersuisut maanna siunnersuutigaat, Nukissiorfiit piginneqatigiiffinngortinneqassasut.
- Nukissiorfiit piginneqatigiiffinngortinneranni sumiiffinni akisussaaqataaneq qulakkeerneqarsinnaavoq, ilaatigut kommunit piginneqataalersinnerisigut, Naalakkersuisut allapput.
