Nukissiorfiit Nuup Kommunianut 17 mio.-it akilissavai

- Østre Landsrettip aaliangiinera naapertorlugu Nukissiorfiit Nuup kommunianut aningaasat akiligassariligai 17 millioni koruuniusut allatut ajornartumik ingerlaanaq akilertariaqassavagut, Nukissiorfiup pisortaa Svend Ove Nielsen oqarpoq, aningaasallu ingerlatsinermiit aaneqassammata atuisuniit tiguneqartariaqassasut erseqqissaatigaa.

Nukissiorfiit Nuup kommunianut 17 millioni koruuninik taarsiissuteqassasoq, Østre Landsret ippassigami aaliangerpoq, naak nunatta eqaartuusivia siullermik Nukissiorfinnut tapersiissuteqarsimagaluartoq.

Tamatumani erngup kissartup ikuallaasarfimmiit pilersinneqartup maanngaanaq kuutsiinarneqarsimanera pissutaavoq, naak Nuup kommunianut isumaqatigiissuteqartoqarsimagaluartoq imeq kissartoq atorluarneqassasoq.

Ilanngullugu oqatigaa ullut 14-it qaangiutsinnagit Nuup kommunianut akiliisariaqassallutik, tigoriaanarnik aningaasaateqaramik.

Naggataatigut atuisut akiliisariaqalissannginnersut Svend Ove Nielsen aperineqarami akivoq, assigiimik akeqartitsineq atorunnaarsinneqartussanngortoq aningaasartuutigisat 2003-minngaaniit aallartittut  najoqqutaralugit, taamaattumillu akiligassat atuisuniit aaneqarnissaat ilimagineqartariaqanngitsoq, naak allatut oqaatigalugu aningaasartuutit atuisuniit tiguneqartussaagaluartut.

Assigiimmik akeqartitsineq massakkut atuupoq, atorunnaarsinneqarpallu missingeruutit 2003-meersut najoqqutarineqassammata, atuisut attorneqarpallaasanngitsut ilimagineqarpoq.

Nukissiorfiit Nuup kommunianut 17 millioni koruuneertariaqalerneranut akisussaaffik sumut inissinneqassanersoq pillugu ingerlatsinermut pisortaq Svend Ove Nielsen aperineqarami akivoq, akisussaaffik nammineq tigusariaqassallugu.