Nunatsinni innaallagissamik imermillu pilersuinermi misilittakkat ilisimasallu issittumi nunanit allanit aamma atorluarsinnaassasut nunatsinni Nukissiorfimmit neriuutigineqarpoq.
Nukissiorfimmi atorfillit maajip qaammataani Nunavuliassapput, tasamani misilittakkat tunngavigalugit paasisanik paarlaasseqatigiittoqassammat. Iqalunni naapittoqarneratigut takuniaasoqarneratigullu Nukissiorfiit paasisassarsiussamaarpoq, issittumilu innaallagissiornerup tungaatigut pilersuinermi paasisimasatik Nunavup nukissiorfiannut Qulliq Energy-mut saqqummiunniarpaat.
Nukissiorfimmi pisortaq Svend Ove Nielsen isumalluarpoq, oqarluni paasisanik paarlaasseqatigiinneq siunissaq isigalugu pitsaasuusoq iluaqutaassasorlu: - Pingaaruteqartorujussuuvoq isumannanngitsumik issittumi innaallagissiortoqarsinnaanissaa, misilittakkavullu Qulliq Energy Corporationip iluaqutigisinnaassavai. Erngullu nukinganik innaallagissiorneq pillugu annertunerusumik Nunavummiut aamma paasisaqarusupput, Nukissiorfimmi pisortaq Svend Ove Nielsen oqarpoq.
Canadami nukissiorfiup Qulliq Energyp pisortaata tullia, Jamie Flahertyp, Nukissiorfiup ilaannakortumik erngup nukinganik innaallagissiornera soqutiginartoqartippaa, oqarluni nunatta Nunavullu assigiissutaat amerlaqimmata tamanna Nunavummi aamma periarfissaalluartoq:
- Soqutiginartorujussuuvoq. Nunavummi ikummatissat akisoorujussuupput, illoqarfeeqqallu ilaasa pilersorneqarnerat akisoorujussuusinnaalluni, Jamie Flaherty oqarpoq, nangillunilu: - Ikummatissap akiata marloriaatingaajaa allaat tikillugu assartuineq akeqarsinnaasarpoq, taamaattumik erngup nukinganik pilersuinissaq nunatsinnut iluaqutaasinnaassaqaaq, Jamie Flaherty nassuiaavoq.
Nunavummi nukissornermut aningaasat atortakkat pingajorarterummik annikillisinneqarsinnaassagaluartut aamma oqaatigineqarpoq.
