Nukissiorfiit kallerup inneranik atuineq akikillerusuppaat

Ingerlatseqatigiiffiup Nukissiorfiit kallerup inneranik akikinnerusumik atuisunut akiliisitsisarumalluni Naalakkersuisunut qinnuiginnippoq. Tamannalu Polaroilip uuliamik ippassaq akikinnerulersitsineranik pissuteqarpoq.
Allattoq Ludvig Siegstad
aggustip 02-at 2012 14:19

- Polaroilip uuliamik ippassaq akikinnerulersitsineranut atatillugu Naalakkersuisunut qinnuiginnippugut nunatsinni kallerup inneranik atuisartut akikinnerusumik akiliuteqarsinnaanissaannut neqeroorfigisinnaajumallugit, Nukissiorfiit pisortaat Henrik Estrup KNR-mut oqarpoq.

Polaroilip uulia liiterimut 30 ørimik ippassaq akikillivaa. Polaroil uuliamik ukioq manna maajip aallaqqaatani liiterimut 58 ørimik akitsuimmat Nukissiorfiit  atuisuminut akitsuivoq.

Assersuutigalugu Nuummi Sisimiunilu kallerup inneranik atuisartut juulip aallaqqaataanit 9 ørimik akitsuiffigineqarput 1,74 koruuninik akiliuteqartalerlutik.

- Naalakkersuisunut qinnuiginnippugut, kallerup innera akikillissasoq, innaallagissiornermi  aningaasartuutit ikilinerattut, Henrik Estrup oqarpoq. Taassumallu naatsorsuutigaa Naalakkersuisunut qinnuiginninnertik akuerineqarumaartoq.

-  Neriuutigaarput, Naalakkersuiunit akineqareerutta, atuisartugut ilisimatikkumaarlutigit kallerup inneranik akikinnerusumik atuisalersinnaassasut, Henrik Estrup erseqqissaavoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq