Nukissiorfiit: Ikamiuni annerusumik tunisassiortoqarsinnaanngilaq

Aasianni Qasigiannguanilu Nukissiorfiit pisortaat oqarpoq Arctic Green Food arlaleriarluni ilisimatittarsimallugu ukiukkut annerusumik tunisassiortoqarsinnaanngitsoq. Arctic Green Food oqarpoq imermik atuinertik Ikamiormiunut eqquinavianngisoq.

Ukiariartornerani Nukissiorfiit kuummiit imiisivimmut pumpii arlaleriarlutik ajoqusersimapput, taamaasillunilu Ikamiormiut maajip tungaannaanut imissaqarsinnaasut ilimagineqarluni.

Erngup aqqutai ajoqutserput Arctic Green Foodip tunitsivittaava annerusumik tunisassiorsinnaasoq naammassilluinnalersorlu.

Nukissiorfiilli ilisimatitsisimanngimmata Ikamiuni tunitsivittaamik ammaaneq erngerluni matusinermik kinguneqarsimavoq.

Aasianni Qasigiannguanilu Nukissiorfiup pisortaa Lars Hoffmeyer oqarpoq Ikamiuni tunitsivik arlaleriarluni ilisimatissimallugu ukiukkut annerusumik imeqartinneqarnissartik ilisimagissanngikkaat, nunaqarfimmiut imissaqarniarnerat salliunneqassammat, imalu nangippoq:

- Nalinginnaasumik imiisivissuaq ulikkaarsimatillugu tunitsivik annikinnerusumik imissaqartinneqartassaaq, killilimmillu pisinnaatillugit ilisimatippagut, tankersuarmi kisimi imermik pilersuisuummat.

Tamatumunnga Arctic Green Foodtip pisortaa Tønnes Berthelsen ima oqarpoq:

”Qalerallit ukiuunerani soorunami qullukkiarisassavagut aammalu saarulliit tigusartakkagut qullukkiarisassavagut taassumalu saniatigut saarulliit tarajorterlugit aammalu uukkat tarajorterlugit nioqqutissiarisassavagut tassa imermik atuisorujussuusussaanngilagut. ”

Qerititsiviit naammassippata aamma qalerallit tunisassiarineqartassapput, imeq immameersoq atorlugu, tunisassiallu naammassineranni imiinnarmik errortuisoqartassalluni.

”Nalunngilluinnarparput imeq imeqarniarnerup tungaatigut atugassat Ikamiuni qanoq ittuunersut aamma taannalu aallaavigalugu tunisassiornissamut piorsaanissarput pilersaarusiornikuuarput ”, Arctic Green Foodip pisortaa Tønnes Berthelsen oqarpoq.