Nukissiorfiit eqqumiitsuliortoq kasiilerpaat

Nukissiorfiup qullersaqarfiata nutaarsuup Nuummiittup paarlersuani nerisarfianilu eqqumiitsuliat Buuti Pedersenip suliassaralui siumut piareersariikkat ikerinnakkut Nukissiorfiit pisortaannit narrugisaallutik unitsinneqarput. Tamannalu eqqumiitsuliortut akornanni aalassassutaavoq. Miki Jacobsen eqqumiitsuliortoqatini sinnerlugu mamiatsassimaqisoq, ima oqarpoq.

-Paasisinnaanngilara pissutigalugu uanga Buutip suliai nalunngilakka. Nuannersorujussuupput, taavalu aamma ukiorpassuit eqqumiitsuliortutut sulinikuuvoq. Ukioq ataaseq suliai asuliinnarput.

Miki Jacobsen taama oqarpoq. Ilisimatitsissutigaa Buuti Pedersen nammaineq aamma oqaloqatigisimallugu, assut pakatseqqasoq.

Nukissiorfiit illutaarsuata siornaak atulersup paarlersua nerisarfialu eqqumiitsulianik pinnersarneqassasoq Svend Hardenberg nukissiornermik pisortaanertut aallarteqqajanngitsoq aalajangerneqarpoq. Sapaatip-akunnera kingulleq Buuti Pedersen Nuummut tikippoq eqqumiitsuliassani inaarsariartorlugit.

Naatsorsuutigisimagaluarpaa qaammat ataaseq Nuummiissalluni. Pisortaaneq ataasinngormat kingullermik saqqummiivigaa, ½ tiimili qaangiutiinnartoq kalerrinneqarpoq Nukissiorfiit qullersaqarfiani eqqumiitsuliortutut atorneqanngiinnassasoq, suliariniakkani Nukissiorfiup avammut kiinnerneranut tulluanngimmata.

Ukioq ataaseq piareersaasiat imaaliallannerinnakkut unitsinneqarmata Buuti Pedersen Tasiilamut angerlaqqiinnarpoq, pakatsisimaqaluni, eqqumiitsuliortutullu kasiiligaasutut misigaluni.

Eqqumiitsuliortoq eqqumiitsuliaminik nivinngagaqanngikkaluartoq Nukissiorfiit aningaasartorfigaat, tusarfiit malillugit koruuninik 100.000 sinneqartunik. Eqqumiitsuliortoq eqqumiitsuliamik piffiginngikkaluarlugu akiliisimanertik sunnguamilluunniit, Svend Hardenbergip ippinnartoqartinngilaa.

-Isumaqatigiissut unioqqutinngilarput, suliaali atornianngiinnarpavut. -Piareersaasiat ilarpassui, aamma aningaasartuutitaqareersut, ullut tamarluinnaasa ajutoortarput, unalu pisoq allaanerunngila.

Buuti Pedersen eqqumiitsuliortutut ataqqivara, suliaali Nukissiorfinnut tulluanngillat, Nukissiorfinni qaammat kingulleq pisortaanertut atorfinittoq oqarpoq.

Eqqumiitsuliortup Miki Jacobsenip asuli pinertut tamanna isigaa:

- Qanoq pakatsinaq. Ukioq ataaseq sulinikuugami Buuti, taama pisoqarnera paasisinnaanngilara.

Nukissiorfiit ingerlanneqarnerat maanna nutarsarneqaleruttorpoq, taamaattumik eqqumiitsuliortup allap suliaanik piniarumaarnerlutik Nukissiorfinni pisortaanerup maannangaaq oqaatigisinnaanngilaa.

Eqqumiitsuliortut nunatsinni peqatigiiffiata KIMIK-up siulittaasua Anne-Birthe Hove oqaaseqartinniaraluaratsigu iluatsitsinngilagut, Danmarkimi suliaqarluni maanna angalammat.