Nukissiorfiit eqqartuussisulersuunneqarput
Ilinniagartuut peqatigiiffiat Dansk Magisterforening nunatta eqqartuusivianut suliassanngortitsivoq, siorna maajip qaammataani ilinniagartuutut atorfilik Nukissiorfinni sulereerluni naamaginartumik illussaqannginnini pillugu Danmarkimut utertariaqalersimanera pillugu.
Arnap Danmarkimut uternini nammineerluni aningaasartuutigisimammagu Nukissiorfiit 60.000 kr.-nik taarsiissuteqaqquneqarput.
Ilinniagartuutut atorfilik arnaq ukiuni marlunni Nukissiorfinni sulereerluni siorna majip qaammataa Danmarkimut utiinartariaqalerpoq, ilaquttanilu naamaginartumik illussaqartinneqarsimannginnamik.
Taassuma Danmarkimut angerlarnini nammineerluni 60.000 kr.-nik aningaasartuutigisariaqarsimammagu, peqatigiiffiata Dansk Magisterforening-ip Nukissiorfiit Nunatta Eqqartuusivianut suliassanngortippaa aningaasartuutigineqartut 60.000 kr.-it akileqqullugit.
Arnap Nukissiorfinni atorfininnginnerani ilaquttanilu tallimanik initalimmi initaassasoq neriorsorneqarsimavoq, ukiullu marluk utaqqiisaasumik ineqartitaanini qatsullugu Danmarkimut utiinartariaqalersimasoq, inatsisleritooq suliamik ingerlatsisoq Jens Paulsen oqarpoq.
Namminersornerullutik Oqartussat ineqarnermut maleruaqqusanik allanngortitsimmata arnaq sisamanik initalimmut innersuuneqarsimavoq, naak tallimanik initalimmik neriorsorneqarsimagaluarluni.
