Nukissiorfiit aktianik piginneqatigiiffinngornissaanut siunnersuut amerlanerussuteqartunit taperserneqanngilaq
Nukissiorfiit aktianik piginneqatigiiffinngornissaannut naalakkersuisut siunnersuutaat Inatsisartuni ullumi oqaluuserineqarpoq, amerlanerussuteqartunilli taperserneqarani. Siunnersuut Siumumit tamakkiisumik taperserneqarpoq, aningaasanut inatsisissap aappagumoortup artukkerneqarpallaannginnissaa ilaatigut oqariartuutigineqarluni.
Siunnersuulli aappaagu akuersissutigineqassasoq inuutissarsiornermut naalakkersuisup Siverth K. Heilmannip neriuutigaa:
- Imaassinnaavoq allatut isumaqartut akerliusut, aamma paasissutissanik sukumiisunik pigunik allatut isumaqalersut. Taamaattumik uanga partiinninngaanniit aamma Siumuminngaanniit oqaaseqartut aallaavigalugit suut tamarmik mattunneqanngillat, aamma suliassaq peqqissaarullugu ingerlateqqaalaassavarput, Inuussutissarsiornermut naalakkersuisoq Siverth K. Heilmann oqarpoq.
Nukissiorfiit aktianik piginneqatigiiffinngorlugit allanngortinneqarnissaat pillugu siunnersuut Inatsisartut 2006-imi ukiakkut ataatsimiinneranni siullermik saqqummiunneqarpoq, nalilersoqqinneqartariaqartutulli oqaatigineqarluni. Siunnersuut Aningaasaqarnermut Ataatsimiititaliami maanna nalilersoqqinneqartussanngortinneqarpoq.
