Nukissiorfiit aktiaateqarnikkut piginneqatigiiffittut

Aningaasaqarnermut Naalakkersuisunngorlaaq Vittus Qujaukitsoq, Siumut, ima oqarpoq:

- Tassa Nukissiorfiit suliffeqarfittut nammineernerusutut inissisimasoq, aktiaateqarluni ingerlatseqatigiiffittut allanngortinneqarnissaa siusinnerusukkut siunnersuutigineqarnikuuvoq. Nukissiorfiit pisortat tamakkiisumik pigisaattut, aktiaateqarluni ingerlatseqatigiiffittut aaqqissuunneqarnissaa takorloorparput. Taamaalilluni Nukissiorfiit suliassamikkut aamma aningaasaqarnermigut, Nunatta aningaasanut inatsisaanit kaanngartillugu namminerisaminik ingerlasinnaalernissaa eqaallisaaffigerusukkatsigu, Vittus Qujaukitsoq oqarpoq.      

Siunnersuut tamanna Inatsisartut 2009-mi ukiakkut ataatsimiinneranni Siumumit saqqummiunneqartumut assingulluinnarpoq, siunnersuulli taamani itigartinneqarluni.

Siunnersuut tamanna taamani saqqummiunneqarmat Siumumit oqaatigineqarpoq, Nukissiorfiit aktiaateqarnikkut piginneqatigiiffinngortinnerisigut ukiuni pingasuni sisamaniluunniit 300 millionit 400 millionit koruunillu akornanni ileqqaarneqarsinnaasut. Aningaasallu taakku suliniutinut pingaarutilinnut allanut atorneqarsinnaassasut.

Siunertarineqartorlu tamanna suli siunertarineqartoq malunnarpoq:

- Tassa neriuutigaarput Nunatta karsianiit toqqaannartumik aningaasanut inatsimmit kaanngartinneqarneratigut Nukissiorfiit eqaannerusumik aaqqissuunneqarnissaat, minnerunngitsumillu sanaartugassat eqqarsaatigalugit, Nukissiorfiit iliuuseqarsinnaanermikkut kiffaanngissuseqarnissaat pingaartikkatsigu.

Aningaasaqarnermut Naalakkersuisoq Vittus Qujaukitsoq taama oqarpoq.

Illuatungiliuttuniilli Demokraatit siulittaasuata Jens B. Frederiksenip tamanna suli upperinngilaa.

Taanna siunnersuummut 2009-mi akerliliilluni taasivoq, isummanilu allanngorsimanngitsoq Radioaviisimut oqaatigaa:

- Nukissiorfiit aktieselskabinngortinneqarnissaat isumaqatiginngilarput. Tassami tamanna atuisartunut akisunerulersussaassammat, Jens B. Frederiksen oqarpoq.  

Jens B. Frederiksen isumaqarpoq, aktiaateqarnikkut piginneqatigiiffinngortitsineq aningaasarsiornikkut iluaqutaanavianngitsoq :

- Una eqqarsaatigineqartussaavoq: Nukissiorfiit avataaniit toqqaannartumik aningaasanik atorniarsinnaassappat, taava erniat annertunerusussaapput. Taassuma saniatigut aamma kikkut tamarmik ilisimavaat aktieselskabinngortitsinikkut taava aningaasarsiat tungaatigut periarfissat allanngulertarput. Taamaammat aamma  naatsorsuutigineqarsinnaavoq, aningaasarsiat qaffannissaat. Taamaammat uagut akerlerivarput, tassami atuisartunut annertoorujussuarmik sunniuteqarsinnaammat, Jens B. Frederiksen oqarpoq.   

Ilanngullugu oqaatigisinnaavarput, Naalakkersuisunngortitsinermi isumaqatigiissummi nunanit allanit nukimmik pisariaqartitsineq minnerulersinniarlugu, Nunatsinni minguitsumik nukissiuuteqarneq annerulersinniarneqarmat.