Nukingisaarut suliarineqalerpoq

Allattoq Mads Lynge
aggustip 22-at 2006 10:40

Upernaviup Kommuneani inunnik isumaginninnermik immikkoortortaqarfiup ikioqqulluni nukingisaarutaa Ilaqutariinnermut Pisortaqarfimmit suliarineqalerpoq.

Pisut ajorluinnarput, allaat ajunaarnersuartut taaneqarsinnaapput.

Upernaviup Kommuneata Ilaqutariinnermut pisortaqarfimmut saaffiginninnermini taamatut oqartariaqarsimavoq.

Upernaviup nunaqarfiini marlunni inuit marluk sapaatip akunnerata siuliani imminorput, ukioq mannalu katillutik arfineq-pingasut imminorsimallutik.

Upernavimmi isumaginninnermut pisortaq Dariusz Sobczynski oqarpoq imminornerit tuniluuttutut ittut.

Upernaviup Kommunea Ilaqutariinnermut pisortaqarfimmit imminorsimanerit pillugit ippassaq paasiniaaffigineqarpoq, inuillu ikiortariaqartut amerlassusaat paaisiniarneqarluni.

- Apeqqutit Upernaviup Kommuneanit ingerlaannaq akineqarput, akissutillu tunngavigalugit ikiuigasuarnissap ilusissaa maanna suliarineqaleruttorpoq, Ilaqutariinnermut pisortaqarfimmi immikkoortortami pisortaq Anthon Møller oqarpoq.

Tarnip pissusaanik ilisimasallit kommuninut ikiuigasuarnissaannut aningaasat 475.000 koruunit, ukioq manna aningaasanut inatsimmi immikkoortinneqarsimapput.

Upernaviup isumaginninnermut pisortaa isumaqarpoq ikiuigasuartussat sianerfigalugit aggeqquneqarsinnaassagaluartut.

- Taama alianartigisumik pisoqartillugu sianerfigisinnaasatsinnik peqartuuppat iluassagaluaqaaq. Suliaminik ilisimasalimmik sianerfissaqarluta, allaffimmiuissuarmillu oqaloqateqaannarata, Dariusz Sobczynski oqarpoq, nangillunilu:

- Sapaatip-akunnerata siuliani imminorsimasut pillugit inunnik eqqorneqarsimasunik ikiuigasuarnissarput pisariaqartipparput, ikiuigasuartussatullu piareersimatitassat Namminersornerullutik Oqartussanit pilersinneqaassanersut KANUKOKA-minngaanniilluunniit pilersinneqassanersut apeqqutaanngilaq, pilersinneqarpata naammaqaaq, Dariusz Sobczynski oqarpoq.

Upernaviup Kommunea ikiuigasuartussanik tallimanngorpat nunaqarfinnut pineqartunukartitsissaaq, Ilaqutariinnermullu pisortaqarfiup akissutaa ullumikkut imaluunniit aqagu paasinarsiumaarpoq.