Nukingernaversaartariaqarpugut

Suliniaqatigiiffiup siulittaasuata eqqartuussissuserisup Anders Meilvangip oqaatigaa, suliniutit angisuut pillugit inatsit Kalaallit Nunaata siunissaanut ima pingaaruteqartigisoq, inuinnaat naalakkersueqataanerat avaqqullugu inuiaqatigiillu tamarmiusut peqataatinnagit inatsit tuaviuullugu aalajangersaasoqartariaqanngitsoq.

- Arriitsumik tuaviussaagut, tassami aatsitassarsiortut aallartippata allannguinissaq ajornarsissaaq, Transparency Greenlandip siulittaasua Anders Meilvang taama oqarpoq.

Inatsisissaq, ingerlatseqatigiiffiit nunap iluanit ikummatissanik aatsitassanillu qalluinissaminnut pisariaqartitaminnik sanaartornissaannik - talittarfinnik, ikaartarfinnik, aqqusinernik, illoqarfinnik  il.il. - akuersissuteqarnissanut sinaakkusiisussaavoq. 

- Nunaqartut tamarmik inuinnaallu inatsisissaq nunamut annertuunik kinguneqartussaq pillugu tusarniarneqartariaqarput, Transparency Greenlandip siulittaasua oqarpoq.

Anders Meilvangip ilanngullugu oqaatigaa, inatsisissatut siunnersuutip Inatsisartuni siullermeerneqarneranut atatillugu ammasumik periuseqarluni qanoq suliarineqarsinnaaneranut Transparency Greenland arlalinnik siunnersuuteqarsimasoq, siunnersuutilli taakku inatsisissamut sapaatip akunnerani matumani oqaluuserineqartussamut ilanngunneqarsimanngitsut.

Anders Meilvang peqquserlulluni akilersittarnerup qanoq pinngitsoorneqarnissaa aamma inatsisiliornermi ammasuunissaq pillugit unnugu Sisimiuni ataatsimiinnermi oqaaseqassaaq. Ataatsimiinneq Hotel Sisimiuni unnugu arfineq marlunut pissaaq.