Nukimmik atorluaaneq sipaarniarfiusinnaavoq

Atuisut suliffeqarfiillu nukimmik atorluaanerunissaat pillugu Katuami isumasioqatigiinnermi tamakku ilaatigut innersuussutigineqarput, nukimmilli atorluaanerunissaq sunaava? Grontmij Carl Bromi siunnersortaanerup Sigurd Lauritsenip tamanna nassuiaatissaqartippaa:

- Illuliaq tamakkerlugu misissorneqartarpoq, nukissiuutillu atorluarneqarnersut paasiniarneqartarluni. Sipaarniarfigineqarsinnaasut taamaaliornikkut qulaajarneqartarput, CO2-millu aniatitsineq aamma annikillisarneqarsinnaalluni, Sigurd Lauritsen, Radioaviisimut oqarpoq.

Nukimmik atorluaanerunissamik taallugu illulianik misissuinerit suliffeqarfinnut imaluunniit angerlarsimaffinnut naleqqunneruppat?

- Allaanerungaanngilaq. Illuammi aamma misissuiffigisarparput, sipaarniarfiusinnaasut qulaajarniarlugit. Isiginnaarutit, DVD-t, qarasaasiat atortorissaarutillu allat nukimmik atuivallaannginnersut paasiniartarparput, nukimmik atuivallaanngippata sipaarniartoqarsinnaassammat, uuliarmi atorneqartoq taamaaliornikkut annikillisarneqarsinnaassammat, Sigurd Lauritsen oqarpoq.

Thorkild Grøndahl Olsen, Inuplanimi ingeniøriuvoq, isumasioqatigiinnermilu aamma peqataalluni. Suliffeqarfiit qanoq iliornikkut sipaarniuteqarsinnaanersut taassuma siunnersortaaffigisarpai, imatullu oqarpoq:

- Aporfiit sumiinnersut eqqartussavagut. Taakku aporfiit millisarneqarsinnaappata imaassinnaavoq uuliamik atuikinnerulersinnaassasugut.

Sulisitsisut Peqatigiiffiat Nukissiorfiillu isumasioqatigiinnermik aaqqissuisuupput.