Nukillaarnermik nappaateqarlutik katsorsartissimasut ujaarineqarput

Qiteqqakkut napparsimalernerup kingorna nukillaarnermik eququgaasut katsorsartarfiat Hornbækimiittoq matusussanngorpoq. Kalaallit nukillaarnermik poliomik nappaateqartut amerlasuut Hornbækimi katsorsartittafimmi 1950-ikkut nalaanni sungiusartinneqarput.
Allattoq Jaaku Lyberth
apriilip 07-at 2011 05:51

Katsorsartittarfiup matunissaanut atatillugu, katsorsartissimasut misigisaannik assinillu pigisaqartut attavigineqarusuttut, aviisimi Helsingør Dagbladimi allaaserineqarpoq.

Assinik taamatullu katsorsartittarfimmiissimasunik ujartuisut tassaapput Hornbækimi Historisk Forening, oqaluttuarisaanermik peqatigiiffik aamma toqqortaasivik.

Historisk Forening siornatigut katsorsartissimasunit attavigineqartarpoq, tassani uninnganerminni pisut paasiniarneqartarlutik, katsorsartillutik sungiusartinneqarnerminni eqqaamasatik annikittarmata, Helsingør Dagblad taamatut allaaserinnippoq.

Qiteqqakkut nappaateqarnerup kingorna nukillaarneq, Danmarkimi Kalaallit Nunaannilu 50-ikkunni annertuumik atugaavoq. Nukillaarnerup kingunerisaanik inuppassuit kingunerlutsitsipput.
Hornbæk Historisk  Forening og Arkiv attavigineqarsinnaavoq oqarasuaat 27 17 05 77 imaluunniit e-mail: info@lokalhistorie-hornbaek. dk