Nukik Seafoodip Anthon Frederiksen naqqippaa

juulip 04-at 2007 16:19

Ippassaq unnukkut radioavisimi tusarliupparput Ilulissani borgmesterip Anthon Frederiksenip uparuaanera Nukik Seafoodip qaleraleeqqanik suliaqarneranut tunngassuteqartoq. Ilanngutassiami kisitsisit taagorneqartut kukkuneqarput.

Tassa Anthon Frederiksen oqarpoq Nukik Seafoodikkormiut qaleraleeqqanik 60.000 tonsinik avammut tunisisimasut, tamanna eqqunngitsortaqarpoq, tassa Nukik Seafoodikkut qaleraleeqqat avammut tunisatik 60.000 tonsiunngitsut 63 tonsiusulli ilisimatitsipput.

- Qalerallit mikivallaarneri pissutigalugit akilersinnaasumillu assammik tisaneqarsinnaanngimmata ilivitsunngorlugit avammut nassiunneqarnissaannut Nukik Seafood Naalakkersuisunit akuerineqarpoq, Nukik Seafood sinnerlugu Petru Biilmann allappoq.

Nukik Seafoodip Qaqortumi qaleraleeqqanik eqqaasimanera Anthon Frederiksenip aamma uparuarpaa.

Nukik Seafood ilisimatitsivoq Qaqortumi innaallagiaarunnerup kingunerissanik qalerallit qerititsivimmiitinneqartut 4.500 kilot missaat iginneqartariaqarsimasut.

Anthon frederiksenip uparuaatinnani paasissutissanik eqqortunik Nukik Seafoodimut paasiniaaqqaarsimannginera Nukik Seafoodimit uggornartutut nalilerneqarpoq.

Ilanngutassiamilu kukkusumik paasissutissiisoqarsimanera maanngaanniit utaqqatsissutigaarput.