Ole Dorph: Nukiit nutaat tigusinissaannut piffissanngorpoq

- Suut tamarmik killissaqartarmata, tunuarnissara aamma ingerlariaqqinnissara piffissanngortoq isumaqarsimavunga, Qaasuitsup Kommuniani borgmesteri, Ole Dorph taama oqarpoq.

Suliniut arlallit annertuut suliarineqarneri iluatsikkiartulersut taassuma oqaatigaa. Suliassanilu naammassiartorlugit misigisimagami, kommunip ineriartoqqinnissaa allanit isumagineqalernissaa piffissanngortoq, Ole Dorph isumaqarpoq.

- Isumaqarpunga ukiuni kingullerni suliagut annertusimasut. Aamma inuutissarsiornermut pilersaarutit annertuut ingerlanneqarput. Taamaattumik massakkut piffissanngortoq, nikilluta inuit nukiillu nutaat massakkut tigusinissaat, Ole Dorph taama oqarpoq, ilanngullugulu oqarluni Qaasuitsup Kommuniata avinneqarnissaa aalajangerneranut sunneeqataanngitsoq.

Borgmesterilli utoqqaliartornera sunneeqataavoq.

Ole Dorphimmi politikkikkut oqallinnerit iliuuseqarnermik malitseqartarunnaariartorsorai, tamannalu tunuarniarneranut sunneeqataavoq.

- Utoqqaliartortillunga naammagittarsinnaassusera annikilliartuinnarami. Taamaattumik tunuaniarlunga massakkut aalajangerninnut nipilersoqataalaarpoq.

Ukiunilu qulikkaani marlunni politikerioreerluni maannakkut sulerissanerluni aperineqarami ima akivoq.

- Pissanganartua. Suliffissaaleqilernissara naatsorsuutiginngilara. Sumi tamaani suliffissarsiussaanga aamma allamik sammisaqarlunga inooqqilernissara qilanaareqaara, Qaasuitsup Kommuniani borgmesteri Ole Dorph taama oqarpoq.

Qaasuitsup Kommuniata avinneqarnissaa pissutigalugu ikaarsaariarnermi ataatsimiititalianut qinersisoqartussaavoq. Taamaammat Ole Dorph Qaasuitsup Kommuniani ukioq naallugu borgmesteriussaaq.