Nukappissat kuugussaasut ajunaarsimassangatinneqarput
Nukappissat marluk Nanortallip eqqaani kuussuaq ikaarniartillugu kuugussaasimapput, maannalu ajunaarsimassangatinneqalerlutik.
Inuusuttut arfineq-pingasut inersimasullu marluk Nanortalimmi klubbiminngaaneersut, Tasermiut kangerluani Tasiusap ungasinngisaani tammaarsimaarsimapput, Tasersuullu qinnguata kuua ikaarniartillugu nukappissat marluk kuugussaasimapput, maannalu periarfeerunneqarlutik.
Nanortalimmi innuttaasut tupassimaqisut, Nanortalimmi politiit pisortaat, Niels Nyvang Nielsen oqarpoq:
- Kikkut tamarmik ajutoorneq oqaluuseraat, taamaaliornikkullu toqqissisaatigilaarsinnaallugu. Kikkut tamarmik nukappissat taakku nalunngilaat, inuillu nikallungaqaat, Niels Nyvang Nielsen oqarpoq.
Tammaarsimaartut VHF-radiokkut politiit ippassaq unnukkut arferngup missaanni kalerrisaarpaat, oqaatigineqarporlu nukappissat marluk, 14-inik ukiulik ataaseq 18-inillu ukiulik ataaseq kuussuaq ikaarniartillugu kuugussaasimasut.
Ajunaarsimasorineqartut nalunaaquttap akunnerini pingasuni ippassaq unnukkut politiit peqataaffigisaanik ujaarineqarsimapput. Allat aamma taarsinissaata tungaanut, tassa aqqarngup-qeqqata missaata tungaanut, ujaasisiimagaluarput, iluatsinngitsumilli.
Ulinngatillugu Tasersuaq aatsaat tikinneqarsinnaammat, traktorit atorlugit umiatsiaq pullattagaq Tasersualiaanneqaleruttorpoq, ujaarlernerlu nanginneqassalluni.
Inuusuttut tammaarsimaarnermi peqataasimasut maanna ikiorserneqaleruttortut, Nanortalimmi isumaginninnermi pisortaq Peter Sonberg oqarpoq:
- Aqqi paasigatsigit ilaqutaasut attavigivagut. Kingorna ilaqutaasut eqqugaasullu allat sammivagut, ullumilu ullup qeqqata kingorna inuusuttuaqqat peqataasut allat sammisimallutigit, Peter Sonberg oqarpoq.
Taanna aamma oqarpoq Namminersornerullutik Oqartussat attavigereersimagitik, tarnip pissusaanik ilisimasalimmik tikisitsinissaq siunertaralugu. Taanna ikiorsiinermik suliaqartussaassaaq.
