Naartut pilersaarutit malillugit tamatigut inunngorneq ajortut 18-inik ukiullip Louisa Pilurtuup paasivaa.
Taanna meerartaartussatut decembarip 22-ani, tassa juulliaraq ullunik marlunnik sioqqullugu, killilerneqaraluarpoq. Novembarilli 16-ani ernisulermat nakorsat Kuujjuaq-mukartinneqarput.
Timmisartuutileqatigiinnit Air Inuit-init Twin Otter Kangiqsujuaq-mut peqqissaasunik marlunnik nakorsamillu ilaasoqarluni tikippoq. Ingerlaannartumillu arnaq Kuujjuaq-mut timmisartumik aallarunneqarpoq. Aqqutaanili Kangiqsujuaq aamma Kuujjuaq-p akornanni nukappiaraq timmisartumi inunngorpoq.
- Pikkunaqaaq. Isumaqaleraluarpunga toqulerlunga, Louisa Pilurtuut Nunatsiaq News-imut oqaluttuarpoq.
Nuannaarutigisaanillu ernertaarpoq peqqissumik, nukappiararlu Williamimik atserneqarpoq. Tassalu nukappiaraq akeqanngitsumik Air Inuit-imut ilaalluni inuunermi sinnera timmisartorsinnaalerpoq.
Maannamuungallartorli ilaqutariit arlaannut angalanissaminnut pilersaaruteqanngillat. Pilurtuummi ernertaannguani ilaquttamilu sinneri angerlarsimaqatiginissaanut qilanaarneruvoq.