Nukappiaraq qerititsivimmut mattussaagaluartoq

Ippassaq unnukkut pisoq anaanaasup Martha Isbosethsen-ip ima oqaluttuaraa.

-Ernitta meeqqat allat aneertut ornissimagamigit pinnguartarfimmut pisiniarfiup eqqaanut, taava susoqartoq paasisimarpiarnagu akuleruffigisimagamigit, sunaaffa meeqqat ullumiummalli pisiniartitsisunik kamassaarisimasut igalaakkut kasuttoqattaarlutik, anaanaasoq oqarpoq.

Ernerat tikkuartuunneqarsimavoq igalaap tungaanut, namminerlu igalaakkut soqarnersoq marsersimavoq, namminerlu kasuttorsimalluni.

- Sunaaffa nukappiaqqat ullumiummalli kamassaarisimasut. Ernerput qimaanani uninngaannarsimavoq. Sulisullu marluullutik takoriaramikku pisuutillugu tigusimavaat. Taava qerititsiviliaassimavaat parnaarullugulu.

Anaanaasoq oqarpoq qerititsiviup ilua qulleqarsimanngitsoq.

- Tre minutsit missaanni taqqamaniissimavoq, kisimiilluni, aniniarsarigaluaramilu iluatsinnginnamiuk matu parnaaqqammat qialluni mobilini eqqaalerlugu ataataminut sianersimavoq.

Sulisut oqaloqateqartoq tusaasinnaalersimariaramikku tre minutsit parnaaruteqqareerlugu aatsaat anisissimavaat. Angajoqqaat pisiniarfimmut saaffiginnikkamik paasitinneqarput inuusuttuaqqaminngaanniit ittorisaminnit inanneqarsimasut meeqqat taamatut kamassaariinnalerpata qerititsivimmut parnaarunneqartalissasut, pillarlugit.

- Uagut isumaqarpugut tamanna meeqqanut eqqunngitsuliornerusoq, taavalu taakku inuusuttuaqqat ukiukitsut sulisut akisussaafferujussuaq tiguaat. Allaat politiilersuupparput meeqqanut taamaattoqartussaanngimmat, Martha Isbosethsen Qaqortumi suleqatitsinnut Jørgen Semionsen-imut oqarpoq. Qaqortumi Pisiffimmiit oqaaseqartitsisinnaasimanngilagut. Pisimasorlu politiit misissuiffigissagaat oqaatigineqarpoq.