Kangaatsiap atuarfia: Nukappiaraq ilinniartitsisuusimasumut pulaareernermi kingorna matoqqasunngortoq

Anaanaasup nukappiaqqap naapertuilluanngitsuliorfigineqarsimasinnaanera nukappiaqqap Kangaatsiarmi ilinniartitsisuusimasumut pulaareernerata kingorna ernumassutigilerpaa.

Allattoq Paarnannguaq Nielsen, Markus Valentin, Irene Jeppson

maajip 13-at 2026 07:48

Nutserisoq Connie Fontain

KNR-ip Kangaatsiap Atuarfiani Iparartarfimmi nakuusertoqartarnera naapertuilluanngitsuliortoqartarneralu pillugit allagaqartunit anaanaasut ilaat oqaloqatigaa.

Taassuma ernini ilinniartitsisuusimasumit atuarfimmi maanna suliunnaarsimasumit kinguaassiuutitigut pinerluffigineqarsimasoralugu oqaatigaa.

Taassuma suliaq ilinniartitsisup atuarfimmi suliunnaareernerata kingorna pigaluartoq meeqqat allat atuarfimmiinnermi nalaanni assingusumik nalaataqarsimasinnaanerat ernumassutigigamiuk oqaluttuaraa.

Anaanaasup suliaq Kalaallit Nunaanni Politiinut unnerluutigisimallugu KNR-imut oqaatigaa. Ilanngutassiaq una taassuma pisimasunik oqaluttuarneranik tunngaveqarpoq.

Taamaammat inuit kinaassusaat isertuunneqartut

KNR-ip suliap ilungersunarnera, nunaqarfiup angissusaa eqqugaasullu atugaat eqqarsaatigalugit suliami ilaasut kinaassusaat sapinngisamik paasiuminaallisarpai.

Aaqqissuisoqarfiup angajoqqaat, meeqqat, inuit oqartussaasut kiisalu unnerluutigineqartut aqqi ilisimavai.

Pissusaa allanngortoq

Anaanaasup atuarfimmi ilinniartitsisuusimasup nukappiaraq paariumasimagaa sanalukkanillu ikiuukkumasimasoq oqaatigaa.

Taassuma ernera pingasoriarluni sisamariarluniluunniit ilinniartitsisup angerlarsimaffianneereerluni taakkungaqqikkusussimanngilaq. Nukappiaqqallu pissutaasoq oqaatigerusussimanngilaa.

Anaanaasup ernermi pissusaa allanngoriartortoq kingorna malugaa.

Angajoqqaani isigigaangata atisaajarusuttarunnaarpoq uffarumajunnaarlunilu.

- Qaammatit marlungajaat uffanngissinnaasarpoq. Uanga arriitsunnguamik ujartuiffigerujussuarpara paasinissaata tungaanut. Qaammatit arlallit, immaqa ukioq ataasingajak paasiniarsarivarput.

KNR ukkatarinnittoq: Kangaatsiap Atuarfia Iparartarfik

KNR-ip meeqqanut killissamik qaangiisumik pissusilersuutit, kinguaassiuutitigut naapertuilluannginnerit nakuusernerillu pillugit oqaluttuat arlallit piffissami tulliuttumi saqqummiutissavai.

Oqaluttuat tamarmik Kangaatsiap Atuarfiani Iparartarfimmi angajoqqaanit meeqqaniillu oqaluttuarineqarput.

Illit imaluunniit nalunngisavit arlaat meeqqat atuarfianni assingusumik nalaataqarsimaguit redaktion@knr.gl-imut attaveqarnissannut tikilluaqqusaavutit.

Kisimiittutut misigisimaguit oqaloqateqarnissannillu pisariaqartitsiguit Tusaanngamut attaveqarsinnaajuaannarputit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit.

Oqarasuaat: 80 11 80

SMS: 1899

Ilaqutariit illuannit ikiorneqartut

Anaanaasup ernini oqaloqatiginiartaraluarlugu iluatsinneq ajoramiuk ilaqutariit illuannit ikiortissarsiorpoq.

- Ilaqutariit illuaniittup meerara makittakkanik apeqqutitalinnik pinnguaqatigisimallugu oqarfigivaanga taava apeqqutit soorlu makkuullutik: Inersimasumit nuanninngitsumik pineqarnikuuit?

Erneralu taama apeqquteqarfigineqarami angerpoq.

- Taava tassanngaanniit qanoq apersornissaanut uanga sakkussaqalerpunga paasinissaanut taamannak pineqarsimanersoq.

- Kisianni oqarumanikuunngiivikkami qanoq pineqarsimanerluni, matoqqalluni piareersimanani.

Anaanaasoq Kalaallit Nunaanni Politiinut aqaguani sianerpoq. Taassumali ernera oqaaseqarumanngimmat politiit suliaq ingerlateqqissinnaanngilaat, anaanaasoq nassuiaavoq.

- Politiinit paasitinneqarpunga meerara arlaatigut qanoq pineqarsimanerminik oqaasinnguinngippat killissamik qaangiisoq suneqarnavianngitsoq, suliarlu uninngaannavissasoq.

Pissusilersuut ilisimaneqarluartoq

KNR-ip Kalaallit Nunaanni Politiit oqaaseqartinniarlugit saaffigai. Taakkuli sulianut ataasiakkaanut tunngatillugu oqaaseqarsinnaanatik oqaatigaat.

Taamaakkaluartorli Nuummi kinguaassiutitigut atornerluinermut immikkoortortaqarfimmi politikommissærip, Katrin Dietzelip suliani taamaattuni suut ilisarnaataasinnaanersut oqaasertalerpai.

Meeqqami pissusilersuutikkut allannguutit takuneqakkajuttartut taassuma oqaatigaa. Meeraq tunuarsimaarnerulersinnaavoq, imaluunniit kamassimanerulersinnaavoq.

- Qaniginerpaasani pissusilersuutitigut allanngortoqarnera suut pissutaasinnaanerinik misissuinissamut tunngavissiisinnaavoq.

KNR-ip Naja Lund Kielsen aamma oqaloqatigaa. Taanna Inulerivimmi meeqqanik inuusuttunillu assigiinngitsutigut naapertuilluanngitsuliorfigineqarsimasunik ulluinnarni suliaqartumi pisortaavoq.

Naja Lund Kielsenip Katrin Dietzel assigalugu suliani taama ittuni pissusilersuutitigut allanngortoqarnera; meeqqalli aamma assigiinngitsorujussuusut namminerisaminnillu takutitsisartut oqaatigaa.

- Meeraq ilisarisinnaanngisamik pissusilersuuteqalerpat tamatuma qisuariarfiginissaa pingaaruteqarpoq, Naja Lund Kielsen oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.