Nukappiaqqamik saassutarinnittut nassuerput

Nukappiaqqamik 14-inik ukiulimmik saassutarinnittut kikkuuneri paasineqarpoq. Nuummi politiit taama nalunaarput.
Allattoq Najaaraq Egede
decembarip 04-at 2009 09:47

Nukappiaraq 14-inik ukiulik kisimi angerlarsimatilluni inuusuttunit qulit aqqaneq-marlullu akornannik amerlassusilinnit arfininngornermi novembarip ulluisa 21-anni iserfigineqarluni unataarineqarpoq, angerlarsimaffianilu aserorterisoqarluni.

Politiit saassussisut arfinillit kinaassusersereerpaat, taakkulu pinerluttulerinermik inatsimmik unioqqutitsisimasutut killisiorneqarlutillu unnerluutigineqassapput.

Nukappiaqqap pinnguaatai Playstation, qarasaasiaq angallattagaq, assiliiviit marluk illumilu aserortereriarlutik saassussisut tillissimavaat.

Nukappiaraq 14-inik ukiulik saassutarineqalerami igalaakkut qimaasinnaasimavoq annerusumillu aqqunartiterani.

- Saassussinermut suna pissutaasimanersoq suli paasisaqarfiginngilarput, aamma 14-inik ukiulik saassussisut ilaannit ilisarisimaneqareerpoq, Niels Nyvang, Nuummi politiinit oqarpoq.

Niels Nyvangip ilanngullugu tusagassiorfiit saassussisut kikkuunerinik ujaasinerminni ikiuutaasimanerannut atatillugu qutsavigai.