Nuka A/S KNI-p ataaniilerpoq

Nuka A/S KNI-Pilersuisumut nuunneqarnerminut atatillugu immikkut ittumik ullumi ataatsimeersuarnermini KNI-Pilersuisuneernerusunik siulersuisoqalerpoq, tamannalu pissusissamisuuginnarpoq, KNI-Pilersuisup pisortaa, Gerhardt Petersen aamma Nukap siulersuisuinut siulittaasunngortoq oqarpoq.

KNI-p kissaatigisimavaa Nukap tiguarneranut atatillugu aallaqqaammullu sapinngisamik annertuumik oqaasissaqartuunissaq, tamannalu Nukap immikkut ittumik ataatsimeersuarnerani siulersuisunik qinersinermi timitalerneqarpoq. Nuka A/S-meersut nuutitaanissap oqaluuserileqqaarnerani isorinnissutaasimasut naammagittaaliutaasimasullu maanna qaangerneqarsimasutut Gerhardt Petersenip nalilerpai, Nuka A/S-illu pisortartaavata isumagisussanngorpaa siulersuisunngortut suleqatigalugit ingerlatsilernerup suleqatigiilluinnarluni pilernissaa, pisortallu nutaap suliassaasa siulliit pingaarnersaraat Nuummit Maniitsumut Sisimiunullu nutsernissap iluatsinnissaa nunaqarfinnilu tunisassiornerup nutaamik aaqqissuunnissaa tunisat nunaqarfinni inereerlugit, allatut oqaatigalugu nereriaannanngorlugit pisisartunut ingerlateqqittarnissaat siunertaralugu.