NUKA Kinami aamma nittarsaanneqassaaq

Nunatta inuussutissarsiornikkut kulturikkullu Washington-mi kitaani avammut nittarsaannera naammassinngitsorluunniit nittarsaanneq alla kangiani aallartereerpoq. Sapaatip akunnera tulliani naalakkersuisut siulittaasuat Hans Enoksen Kinaliortunut angalaqatigiinnut 20-t missaanniittunut siuttuussaaq, inuussutissarsiornermik ingerlatsisut inuussutissarsiornermullu naalakkersuisoq Johan Lund Olsen peqataassallutik. Taakku Kinami illoqarfiit pingaarnersaat Beijing Shanghai-lu takusagassaraat naapitassaraallu Kinap ministeriunerup tullersortaa kiisalu inuussutissarsiornermut ministerip tullersortaa.

Inuussutissarsiornermik ingerlatsisut pilerisaarinerminni peqatigissavaat niuernermik

nioqqutissiornermillu ingerlatsisut kiisalu takornariaqartitsinermik ingerlatsisut. Taakkununnga ilaavoq Nuka A/S-ip pisortaa Tønnes Berthelsen:

- Takorlorpara nunatsinni aalisakkat pigeriikkagut piumaneqarpaallanngitsullu Kinamut tunisarisinnalissallugit, soorlu aammassaat, qeeqqat, suluppaakkat eqalussuillu, Tønnes Berthelsen oqarpoq.

Nuka A/S-ip pisortaa tunisassiassanik nutaanik Kinamut tunineqarsinnaasunik ujartuissaaq, Nuka-p Kinami attaveqarfii killeqarmata. Neriupporli aalisarnermik inuussutissarsiutillit naapinnerminni Nuka-p tunisassiarisartagaanut soqutiginninnerulissasut.