Nujus akiliisinnaajunnaarpoq

Nerisassanik ingerlatsivik Nujus, inatsisartuni ilaasortaasimasumit Naalakkersuisuusimasumillu Mikael Petersen-imit piginneqataaffigineqartoq, millioninik arlalinnik akiligassaqarluni akiliisinnaajunnaarpoq.

Sermitsiami ullumi saqqummersumi allaaserineqarpoq, nerisassanik ingerlatsivik Nujus sapaatip akunnerani kingullermi ilaatigut katillugit 3 millioni koruuninik akiligassaqarluni akiliisinnaajunnaartoq.

Nujusip akilersuinini ukiortaap kinguninngua unitsippaa. Tamanna pivoq akiligassaqarfiit ilaata, Nuup Kommuneata, ingerlatsiviup akiliisinnaajunnaartutut nalunaarutigineqarnissaanik piumasaqareernerata kingorna.

Akiliisinnaajunnaartumik nakkutilliisoq, eqqartuussissuserisoq Niels Hansen Damm oqarpoq, akiligasssat tamarmiusut ullumikkut 7 millioni koruunit missaanniittut. Akiligassaqarfiilli arlallit

ingerlatsiviup Nuummi fabrikkiani kiisalu takornarianut angallammi qularnaveeqquteqarput.

Taamaattumillu nakkutilliisup naatsorsuutigaa pigisat tunineqareernerisigut akiligassat tamarmiusut 3 millioni koruuninut appartinneqarsinnaasut.

- Kisitsisilli taakku allanngorsinnaapput. Ilaatigut apeqqutaavoq tunisinermi aki, kisianni aamma akiligassaqarfinnit nutaanik piumasaqaateqartoqarsinnaavoq, Niels Hansen Damm Sermitsiamut oqarpoq.

Nujus-imi pisortaasimasoq, Mikael Petersen, oqarpoq, ilimagisimasamit amerlanerusunik akiligassaqalersimaneq tupaallannartoq, patsiseqarnerarpaali:

- Maani ingerlatsivinnut aallarterlaanut piumasaqaatit amerlaqaat, pisortanillu tapersersorneqarneq ikiorneqarnerlu annikeqaat, Mikael Petersen Sermitsiamut oqarpoq.