- Suliffeqarfiuteqarluni arlaatigut taperneqarsinnaaneq piukkunnarnerpaassasoraara, uagummi aamma akileraartartuuvugut, nujaleriffiutilik Elisa Pike oqarpoq.Assi: KNR

Nujalerisup Elisap erninermusiaqarumalluni nujaleriffiutini matugallartariaqaraa

Elisa Piketut namminersorlutik inuussutissarsiutillit erninermusiaqarnissaat pitsaanerulersinnaavoq. Taassumami erninermusiaqarumalluni nujaleriffini matusariaqarsimavaa.

Erninermut atatillugu sulinngiffeqarnermi aningaasarsiaqarnissat sumi atorfeqarnermi apeqqutaavoq.

Pisortani atorfillit aningaasarsiaqaannarlutik sulinngiffeqarsinnaatitaasut, namminersortuni sulisut ilaasa tamanna periarfissarinngilaat.

Namminersortunut tamanna aporfiusinnaasartoq nujalerisup misillerfigisimavaa. Taassumami erninerminut atatillugu sulinngiffeqartussanngorami nujaleriffiutini matugallartariaqarsimavaa.

- Namminermi nujaleriffiuteqalernissara sinnattoriuaannarnikuuara. Matusussanngormallu uguarnatippara. Kisianni aamma erninerma kingorna sulinngiffeqarnissannut qilanaarlunga. Taamaattumik nuannerlunilu nuanniippoq, Elisa Pike oqarpoq.

Erninermut aningaasaateqarfik
 

Namminersorlutik inuussutissarsiutillit taakkununngalu sulisut erninermut atatillugu sulinngiffeqarnerminni aningaasarsiamik 80 procentii paariinnartassagaat Naalakkersuisut anguniarpaat.

 

Sulisoqarnermut akitsuutip namminersortut akilertagaat 0,2 procentimik qaffaanneranit aningaasalersorneqassaaq.

Ukiumut 19 millionit koruuniussalutik.

Taassuma erninermit atatillugu sulinngiffeqangajalerluni nujaleriffiutini matugallarlugu allami suligallaqqullugu akileraartarnermut aqutsisoqarfimmit siunnersorneqarpoq. Taamaaliornikkummi kommunimit erninermusiaqarsinnaavoq.

- Siornatigut ernereernermi pisartagaqarnikuugama, kommunimit pisartagassakka amerlanavianngitsut ilimagereerpara. Taamaammat qanoq pisartagaqarnissara naatsorsukannereernikuuara.

Sumi sulinerluni akunnerillu suliffiusimasut erninermusiat amerlassusaannut apeqqutaasarput.

Elisa Pike qaammammut 8000 koruunit missaannik erninermusiaqarnikuuvoq.

Ukiaanerani ataatsimiinnermi suliarineqassasoq

Taannalu taama aqqusaagaqartuni kisimiinngilaq. Naalakkersuisut namminersortuni atorfilinnut erninermusianut inatsimmut allannguutissatut siunnersuisuutat Inatsisartunit tunuliaqutserneqassappat taama periuseqarneq oqaluttuaannanngussaaq.

Namminersortunut sulisuinullu erninermusiaqartitsinissamut aningaasaateqarfimmik pilersitsinikkut sulisut aningaasarsiaasa 80 procentii erninermut atatillugu sulinngiffeqarnerminni matussuserneqarsinnaalissapput.

Taannalu sulisoqarnermut akitsuutinut namminersortut akilertagaannut 0,2 procentimik qaffaanermit, ukiumut 19 millionit koruunit missaannik naatsorsorneqartunik, aningasalersorneqassaaq.

Naligiinnerusumik atungaqartitsinissaq siunertaasoq isumaginninnermut, ilaqutariinnut inatsisinillu atuuttitsinermut naalakkersuisoq oqarpoq.

- Uani aningaasaateqarfiliornikkut minnerpaaffiliisoqassaaq, Martha Abelsen Nunatta Nipaanut oqarpoq.

Ernermusianut aningaasaateqarfeqalissappat nuannerluinnarpoq

Tamannalu pisariaqartoq nujalerisoq isumaqarpoq.

- Suliffeqarfiuteqarluni arlaatigut taperneqarsinnaaneq piukkunnarnerpaassasoraara, uagummi aamma akileraartartuuvugut.

Taamaammallu aningaasaateqarfimmik pilersitsiniarneq Elisa Pikep tusarluarpaa.

- Tusagaq nuannerluinnarpoq. Ila immaqa erninermi sulinngiffeqaqqinniaannaraanni. Tusagaq nuanneqaaq, taamaattoqarnissaami amigaataaginnarsimavoq, Elisa Pike oqarpoq. Taanna erninermini sulinngiffeqareernermi kingorna nujaleriffiutini ammaqqippaa.

Erninermusianut aningaasaateqarfeqalernissaanut siunnersuut Inatsisartut oktobarip aallaqqaataani siullermeerlugu suliarissavaat.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat