Nujaasatik peernialerpaat

Tuluit ileqqutoqqanik attassiniartartuusutut ilisimavagut. Eqqartuussisut eqqartuussisuserisullu nujaasalerlutik sulisut ulloq manna tikillugu takusarsimavagut, tamannali allanngortinneqalerpoq.

Nujaasat ilinngaartut hiistit nujaannit sanaajusut 1600-jukkunniilli atorneqartalersimapput, nutaanilli inatsisiliornikkut tamakku peersinniarneqalerlutik.

Atisarisartagaat aamma allanngortinneqalerput.

- Eqqartuussisut eqqartuussiviit qullersaanniittut atisanik assigiinngitsunik tallimanik peqartarput, tassa uliguarsualerlutik sulisaramik.

Suliap suunera ukiorlu qanoq ilinera apeqqutaatillugu assigiinngitsunik atisaqartarlutik, Eqqartuussisuunerit præsidentiat Lord Phillips of Worth Matravers oqarpoq.

Atisanut uliguarsuarnut nujaasanullu aningaasartuutit maanna annikillisarneqarsinnaalissagunarput. Nujaasammi 15.000 koruunit sinnerlugit akeqartarput.

Eqqartuussisuserisut ilaasa ataqqinassusiiagaanissartik aarleqqutigalugu inatsimmut nutaamut akerliunertik takutippaat.