Tuluit eqqartuussisui eqqartuussissuserisuilu nujaasaaruttussanngulerunarput. Tuluit nutaarsiassaqartitsiviisa arlallit taama nalunaarnerat JyllandsPostenip allaaseraa.
Eqqartuussivinni eqqartuussisut eqqartuussissuserisullu hestip nujaanik nujaasaqartarnerat 1600-kkunnili atuutilersoq, itsarpaluppallaaralugu eqqartuussiveqarnermi siorna qullersanngortumit Baron Nicholas Phillips-imit atorunnaarsinniarneqarpoq.
Innuttaasut 2002-mi isumasiorneqarmata paasinarsivoq, 42 procentiisa eqqartuussivimmi qaqorujuttunik imusakkanillu nujaasaqartarneq quianaannartutut isigilersimagaat.
Nujaasat atorunnaarsinneqarnerisa saniatigut eqqartuussisut eqqartuussissuserisullu uliguaat siilikiusut aamma atorunnaarsinniarneqarput.
Assersuutigalugu eqqartuussisuuneq uniforminut - nujaasanut uligussanullu - atugassanik ukiumut 170.000 koruunit missaanniittunik naalagaaffimmit taperneqartarpoq.
Nujaasaannaat 23.000 koruunit angullugit akeqarsinnaasarput.
Tuluit eqqartuussiviini arlalinni nujaasaqartarneq ukiuni kingullerni atorunnaarneqareersimavoq.