Nuannisarneq, ataatsimoorneq aliasunnerlu: Juullimut misigissuserpassuupput
Aqagu juulliarartussaavoq, KNR-illu Nuuk Centerimi ullaap tungaani saneqquttut juullip qanoq isumaqarneranik apeqquteqarfigai.
Pilutannguaq Kloster, 27-nik ukiulik, angerlarsimaffeqanngitsoq
Juullernissaanut ileqqut inuit ilaannut nuannaarnerinnaaneq ajorput. Juulleriartornera Pilutannguaq Klosterip misigissusaannut sakkortupput.
- Juullilernera malugisinnaanngilaq, meeqqakkali marluk isumannaatsumik Danmarkimiimmata nuannaarutigaara. Ajunngippata isumannaatsumiippatalu nuannaassaanga aammali aliasulaapunga. Meeqqama juullikkunni tusarfiginissaat qilanaaraara.
Pilutannguaq Klosterip aqagu decembarip 24-anni neriffissaqarnissani qulakkeeqqavaa, angerlarsimaffeqanngitsullu allat juullip ulluisa sinnerini ilagalugit sulerineri malinnaaffigissavai.
Jacob Mølgaard, 49-nik ukiulik, timmisartortartoq aallaaniartorlu
Juulli juulliaqqap aqagunnerani nalliuttartumut, Jacob Mølgaardimut ataatsimoorfiuvoq.
- Juulliuna uummatitta nalliuttorsiorfiat. Ataatsimuussaagut. Uanni ilaqutariippassuuvugut. Ataataga angajoralu tikinnikuupput, taamaammat ilaqutariippassuulluta nuannatissaagut.
- Siullertut savatorlutalu qeerlutoortussaagut, aamma tuttu nerisassat ilaanniippoq. Piariilivilluinnarpugut. Ulapinnissamut annikitsuinnanngoqqapput.
Anna-Sofie Hurup Skjervedal, 34-nik ukiulik, siunnersorti
Anna-Sofie Hurup Skjervedalimut qaniginerpaasat najornissaat juullip immikkuullarequtigaa.
- Juulli tassaavoq eqqissisimaarneq ilaquttallu aamma immikkut ittumik ataatsimoorussinissaq.
- Juullimi nerisassanik qeerlutuumik, naatsiianik kajorsakkanik risalamandenillu nerisaqassaagut. Uanga risalamandiliussaagut, ukiut tamaasa sanasarpakka. Ikittunnguussaagut, arfinilinnit arfineq-marlunut.
Karl, 59-inik ukiulik, ilinniartoq
Juulli Kaalimut immikkut illuinnartuuvoq.
- Juulli isumaqartorujussuuvoq. Meeraallungali anaanama, ataatama aanaamalu juullisiorluarnissarput piareersartarpaat, ilaqutariilluartuni peroriartorpunga. Tuttunik, umimmannik qeerlutuumillu ileqqoq malillugu nerisaqassaagut.
- Ukiut tamaasa taama nerisaqartarpugut. Aamma ukiut tamaasa tuttunniarlutalu umimmanniartaratta nerisassaqarluarpugut. Juullimi tunissutissarniarnissamut ulloq kingulliuvoq, taamaammat misissuerujoorpunga.
