Nualluummut akiuussutissalersinnissamik kikkut tamarmik neqeroorfigineqarput

Pingaartumik meeqqat inuusuttullu akiuussutissalersinnissaannut tamanna isumassarsiatsialaavoq, nakorsaaneq Flemming Stenz erseqqissaavoq: - Nualluutit allat assiginagit H1N1-ip inuit inuusunnerusut allaninngarnit sakkortunerusumik eqqortarai paasinarsivoq. Taamaalilluni takuneqarsinnaavoq utoqqaat nualluummut H1N1-imut akiuussutissaqartut, tamannali misissuiffigineqarsimanani.

Nunarsuarmi peqqinnissakkut suliniaqatigiiffiup WHO-p tunillaassuuttoqarnissaanut piareersimaneq ingerlatiinnarpaa, tassami nualluutip nutaap allap sumiiffinnut pingaartumik nunarsuup affaata kujataatunganut suli anngussimanngitsup takkunnissaa mattunneqarsinnaanngimmat.

Nappaat tunillaassuuttoq tassaavoq nappaalanersuq nunarsuarmi tamarmi atuuttoq. Nualluut nutaaq takkusimaalissappat illit aanni akiuussutissaqaruit iluatsitsinerussaatit - pingaartumillu nualluummit siullermit eqqugaanngikkuit taamalu timinni akiuussutissamik pilersitsisimanak.

Nunatsinni maani H1N1-ip tunillaassuunnera decembarimi annertunerpaajuvoq, illoqarfiilli assigiinngitsorujussuarmik eqqorneqarlutik. Piffissaq nualluutillu qanoq sakkortutiginera eqqarsaatigalugu: - Nualluummik nutaamik tunillaassuuttoqalissappat aamma Kalaallit Nunaanni sumiiffinnut H1N1 aatsaat takkussimanavianngilaq inuillu aamminni akiuussutissallit iluatsitsinerussallutik. Taamaalisoqarnissaa ilimananngikkaluarpoq mattunneqarsinnaananili.

Peqqinnissamut nakkutilliisoqarfik qaammatini kingullerni nualluuttoqarneranik nalunaarfigineqarsimanngilaq.