Nuallukkaanni H1N1-unersoq misissorneqartalerpoq

Nualluttut H1N!-imik tunillanneqarsimanersut ullumimiit misissorneqartalissasut Nunatta nakorsaanerata nalunaarutigaa. Sermitsiap nittartagaani tamanna atuarneqarsinnaavoq.

Influenza A, imaluunniit H1N1 Nunatsinni suli atugaalinngikkaluarpoq, suullu tamatumunnga peqqutaanersut suli ilisimaneqarani.

Taamaattoq nappaalasoqalersinnaaneranut upalungaarsartoqarniarpoq:

- Nunatsinni suli atugaalinnginneranut suut peqqutaanersut nalugaluarpavut, aammalu nalullutigu H1N1 Europami massakkut nappaataasoq qanoq sakkortutiginersoq. Pinaveersaartitsinissamulli iluaqutaasinnaasut tamaasa atorluartariaqarpagut. Taamaattumik influenzangasumik nappaateqarlutik ullumikkumiit nakorsiartussat tamarmik H1N1-imut misissorneqassapput, Kalaallit Nunaanni nakorsaaneq Flemming Stenz oqarpoq.

H1N1-imut akiuussutissanik tikisitsimallutik Flemming Stenzip Peqqissaanermik Ilinniarfimmi ippassaq unnukkut oqaluttuaraa, akiuussutissallu sinerissamut siammarterneqarumaartut oqaatigalugu.

- Inuit katsorsarneqarsinnaanngitsunik soorlu sukkornermik, aakkut nappaatinik allanillu nappaatillit naartusullu salliutinneqassapput kiisalu peqqinnissaqarfimmi sulisut, Flemming Stenz oqarpoq, nangillunilu:

- Inuusuttut salliutinneqassapput, kikkulli akiuussutissamik kapineqassanersut nakorsap nalilertassavaa, oqarpoq.