Qinnuteqartut suliniummut ataatsimut 5 millionit koruuninik qinnuteqarsinnaapput. Toqqorsivimmit assiAssi: Thibault Savary/AFP/Ritzau Scanpix

Novo Nordisk Fonden coronavirusip akiorniarneranut 50 millionit koruuninik immikkoortitsisoq

Novo Nordisk Fonden coronavirusimut akiuiniarnermut suliniutinut 50 millionit koruuninik ikiuiniarpoq. Nunatsinni suliniutit aamma aningaasaliissutissanit pissarsisinnaapput.

Aningaasaateqarfiup Novo Nordisk Fondip coronavirusumik nappaalanersuaqarnerani pinasuartumik iliuuseqarnera suliniutinut aamma atuuppoq.

Aningaasaateqarfik tusagassiutinut taama nalunaaruteqarpoq.

Novo Nordisk Fondip coronavirusip tuniluutilernerata pinaveersimatinneqarnissaanut atatillugu suliniutinut katillugit 50 millionit koruuninik aningaasaliissutigai, suliniutillu nunatsinniittut matumani aamma ilaallutik.

Suliniutit erngertumik aallartinneqassasut

Coronavirusip nunani tamalaani tuniluutilernera unitsinniarlugu iliuuseqartoqanngippat peqqinnissaqarfiit ilungersunartorsiortinneqarnerat anigoruminaallissasoq Novo Nordisk Fondip allaaseraa.

Sulinitinut qaammarsaanermut, isumaginninnermut ilisimatusarnermullu tunngasunut suliniuteqarnissamut atatillugu tapiissutisinissamut qinnuteqartoqarsinnaavoq:

- Peqqissutsimut tunngatillugu imaannaanngeqisunik unammilligassaqarpugut. Suliniutikkut matumuuna COVID-19-ip sunniutaanut tunngatillugu, inunnut ataasiakkaanut inuiaqatigiillu ataatsimut isigalugit iluaqutaasussamik iliuuseqarfiginissaannut tapersersueqataasinnaanissarput neriuutigaarput, aningaasaateqarfiup Novo Nordisk Fondip siulersuisuini siulittaasoq Lars Rebien Sørensen oqarpoq.

Suliummut ataatsimut 5 millionit koruunit tikillugit

5 millionit koruunit suliniummut ataatsimut aningaasaateqarfimmit qinnutigineqarsinnaapput, qinnuteqaatillu naliliivigineqartassammata qinnuteqarfissaq killilerneqanngitsoq aningaasaateqarfiup nalunaarutigaa, pisullu imaannaanngitsuunera eqqarsaatigalugu qinnuteqartut nalunaaquttaq akunneri 48-t iluanni akissutisisassallutik.

Qinnuteqartoq, pisortat suliffeqarfiini namminersortuniluunniit iluanaarniutiginagu suliniaqatigiiffinni Danmarkimi, Savalimmiuni nunatsinnilu, coronavirusimik patsiseqartumik nappaalanersuaqarneranik akiuiniaqataasunit aallaaveqassasoq, Novo Nordisk Fondenip allaaseraa.

Isummersuutit

Coronavirusimik tunillatsinissaq pinaveersaaruk

Nunatsinni coronavirusi pillugu killiffik

  Misissorneqareersimasut 7701
  Tunillanneqarsimasut 14
  Peqqisseqqittutut nalunaarutigineqartut 14
  Napparsimavimmi uninngasut 0
  Anersaartuuteqartitaasut 0
  Toqquteqartut 0
Pissarsivik: nun.gl
  Nutarterneqarpoq
  septembarip 23-at 2020 nal. 10:45