Northwest Territoriesimi nunap attaveqaqatigiiffii siuarsarnialerpaat

Ajornartorsiutit ukiuni qulikkaani aaqqiiviginiarneqarsimanngitsut pillugit ataatsimeersuarneq taaguuteqarpoq 'Strategic Northern Infrastructure Symposium':

- Ajornartorsiutit imaaliallaannarlugit aaqqiivigisinnaanngikkivut nalunngilara, oqallisigineqarnissaannulli ammavugut, Brendan Bell, Yellowknifemi ataatsimeersuarnermut aaqqissueqataasoq oqarpoq, nangillunilu:

- Whitehorsemeersunik Iqalunneersunillu suleqateqarnissarput neriuutigaarput, ajornassanngippallu Anchorage-iminngaanneersunillu suleqateqarusussinnaavugut. Qanoq iliornikkut suleqatigiittoqarsinnaanissaa aningaasaliissutissanillu avitseqatigiittoqarsinnaanissaa oqallisigineqarsinnaalluni, Brendan Bell oqarpoq.

Nunami attaveqaateqarfiit pingaarututeqartut pillugit Canadap avannarpasinnerusortaani suliffeqarfiutillit tamaanilu oqartussaasut isumaqatigiissuteqarnissaat, Chuck Strahlip, indianernut Canadallu avannarpasinnerusortaanut tunngassuteqartunut immikkoortortaqarfimmi aqutsisup kajumissaarutigaa.

Isumaqatigiittoqarsinnaassappat, Canadami oqartussat ikiorsiisinnaanissaat aamma neriorsuutigaa.

- Canadap avannarpasinnerusortaani attaveqarfiiit pitsaappata inunnik isumaginninnikkut periarfissat pitsaanerulissapput, soorlu aamma aningaasarsiorneq aamma pitsaanerulersinnaasoq, Chuck Strahl pingasunngormat oqarpoq.CBC Northip nittartagaani tamanna atuarneqarsinnaavoq.