North Greenland Seafood sunarpiaasoruna?
Piginneqatigiinnit pigineqartoq aalisariutileqatigiiffik North Greenland Seafood siorna novembarip 28-iani eqqartuussisoqarfik Københavnimiittoq aqqutigalugu aalisartunit kalaallinit Ilulissaneernerusunit aallartinneqarpoq.
North Greenland Seafood aalisartunit raajarniartunit qaleralinniartunit aammalu umiatsiaararsortunit pigineqarpoq.
Siulersuisut tallimanik inuttaqarput tassaallutik, siulittaasoq Anthon Frederik Lindenhann, Martin Sandgreen, Vittus Erik Isak Lange, Tobias Sandgreen, Otto Stephen Tobias Lindenhann aammalu Karl Jan Marius Jacob Fleischer.
Taakkulu tamarmik piginneqatigiiffimmut tassunga piginneqataasuupput.
Taakkunannga piginneqataasunit sisamat Qeqertaq Fish aps-mi piginneqataagaluarput maannalu tassunga piginneqataajunnaarsimasut Anthon Frederik Lindenhannimit oqaatigineqarpoq.
- Aningaasat nunatsinni kaaviaartinneqarnissaat pingaartipparput, aningaasat selskabinut allanut tunniunneqartarnerat millilerusullugu North Greenland Seafood aallartipparput, minnerunngitsumik aamma qalerallit aalisapilunneqartartut millisinnissaat eqqarsaatigalugit taama pilersitsivugut, Anthon Frederik Lindenhann radio aviisimut oqarpoq.
North Greenland Seafood ulluni makkunani Polar Seafoodimut angallammik attartornissamik isumaqatiginninniarluni Københavnimi isumaqatiginninialeruttorpoq, tassalu imaappoq North Greenland Seafoodimut nammineerlunilu aalisariutaateqanngitsumut Naalakkersuisunit Naalakkersuisullu siulittaasuannit Hans Enoksenimit nalinginnaanngitsumik immikkut ittumik akuersissutigineqarlutik saarullittassiissutigineqartut 1000 tonsit aalisarniarlugit angallammik attartorniarluni maanna isumaqatiginninniarpoq.
Isumaqatiginniarnerli maannakkorpiaq qanoq innersoq piginneqatigiiffiup oqaaseqarfigisinnaannginnerarpaa suli isumaqatigiinniarnerit ingerlammata. North Greenland Seafoodimiilli oqaatigineqarpoq ukioq naatinnagu saarullittassiissutigineqartut 1000 tonsit aalisarumaaritik.
North Greenland Seafood saarullittassanik 2000 tonsinik qinnuteqaqqaaraluarpoq 1000 tonsinilli tunineqarlutik.
