Norskit uuliasiornermik misilittagaat Nunatta ilinniarfigisussanngorpaa
Tamanna ippassaq saqqummiunneqarpoq, Nunatsinni CO2-mik mingutsitsineq pillugu danskit kalaallillu isumaqatigiinniarneranni ingerlariaqqittoqareersorlu.
Isumaqatigiinniarnermi kalaallit kissaataat tusaaniarneqarmata Kuupik Kleistip nuannaarutigaa, peqatigisaanilli erseqqissarlugu, kissaatigineqartuni avatangiisit pinngortitarlu ataqqillugit pinissaa Kalaallit Nunaata ilungersuutigiumaaraa.
Tamatumunnga atatillugu norgimiut nunanut allanut ministeriata Kuupik Kleist Norgimut tikeraarsarpaa.
- Norgimiut Nordsømi uuliamik nassaarnermik kingornagut misilittagariligaat taamaalilluni paasisaqarfigisinnaassavaat, Jonas Gahr Støre nutaarsiassaqartitsivimmit Ritzauimit issuarneqarpoq.
Mexico peqatigalugu aningaasaateqarfimmik pilersitsinissaq Norgip siunnersuutigaa, nunat ineriartortut silap pissusaanut iliuuseriniagaat taamaalilluni taperserneqarsinnaaniassammat.
- Københavnimi pitsaasumik angusaqartoqassappat, nunanut ineriartortunut atatillugu pitsaasumik isumaqatigiissuteqarnissaq pisariaqarluinnarpoq. Taama isumaqatigiissuteqarnissamut ataatsimoorluta siunnersuutitta aqqutissiuusseqataanissaa neriuutigaarput, Norgimi ministeriuneq Jens Stoltenberg arfininngormat oqarpoq.