Norskit Niviaq illersorpaat

Niviaq Chemnitz Berthelsen naatsumut unamminermi normu 63-inngorpoq peqataasunit 87-init sisamanngornemi unamminerit nanginneqarmata.
Allattoq Noah Mølgaard
februaarip 24-at 2011 09:05

Sisoraatinik oqilaniuttartoq Niviaq Chemnitz Berthelsen tusagassiortunit soqutigineqartuarsinnarpoq sisoraatinik oqilaniunnermi Oslomi VM-rtoqarnerani. Ullumikkut 1 kilometerimut ingerlarsornermi unammisoqarpoq.

Kalaaleq sisorartartoq taanneq kvartfinalemut annguttut 30-t akornanniinngilaq unamminerni normu 63-itut inissikkami.

- Misigisaq nuanneqaaq aqqutaa tamaat isiginnaartorpassuaqarami tusaasinnaavakkalu nilliarpaluttut "Grønland, Grønland", taama Niviaq Chemnitz Berthelsen KNRimut oqaluttuarpoq.

Pingasunngornermi unammisoqarmat 10 kilometerimut unamminissamut anngunniunnermi ajugaanermi kingorna tusagassiortunit unngunneqarpoq sulilu soqutigineqarnera annertuvoq naak sisamanngornermi naatsumut unamminermi kvartfinale angunngikkaluarlugu.

- Norskit Finlandimiullu aviisiinit apersuipput. Aamma norskit radioannit apersorneqarpunga kiisalu tv-kkut toqqaannartumik aallakaatitsinermi aamma apersorneqarlunga, taama Niviaq Chemnitz Berthelsen oqaluttuarpoq.

Qangatoorlugu 10 kilometerimut unammineq ataasinngorneq februaarip 29-at ingerlanneqassaaq saarlisaarlunilu 30 kilometerimut unammineq arfininngorneq martsip tallimaat ingerlanneqassalluni.

- Takisuumut unamminerni ingerlalluartarama 30 kilometerernissarput pissanganarpoq. Kisianni aamma unammisut pikkorissorpassuummata takussavarput qanoq angusaqarumaarnersunga, taama Niviaq Chemnitz Berthelsen oqarpoq.