Norskit marluk toqumut eqqartuussaalerunarput

Pinerluttuliornermik suliassaq taanna paasiuminaatsuuvoq, Norge Congolu ilanngunneqarlutik. Maannalu tassa Congop Norgemit allaat 2,5 billionit koruunit sinnerlugit taarsiivigineqarnissani piumasaralugu. Inuusuttut taakku marluk 27-nik 28-nillu ukiullit congomiumik biilinik ingerlatitsisuminnik maajimi toqutsisimasutut unnerluutigineqarput. Taakkua motorcykelinik Afrikami angalaarput, taama oqaluttuarpoq Norgemi aviisimit Dagbladetimeersoq, Thorgeir Krogfjord. Taanna Congomiit ima oqaluttuarpoq:

- Biilimik ingerlatitsisup aamma toqutaasup biilianik attartornerannut pissutaavoq motorcykeliisa aallarsinnaajunnaarsimanerat. Biilimi aamma marlunnik ilaasoqarpoq suliassami uppernarsaatissatut pingaarnersaasunik. Taakku oqarput biilinik ingerlatitsisoq angutinit marlunnit taakkunannga toqunneqarsimasoq, kingornatigullu namminneq aamma toqunniarsimagaluaraatik. Eqqartuussinermik suliassaq inaarneqangajalersoq Thorgeir Krogfjord oqarpoq.

Inuusuttunut taakkununnga marlunnut pillaatissamik piumasaqarneq unnerluussisussaatitaasut ullumi saqqummiutissavaat. Tassanilu Norgep nunanut allanut ministereqarfia ikiuutissasoq oqaatigineqarpoq.

Norge naalagaaffittut suliassami tamatumani ilanngunneqanngitsoq, nunanulli allanut ministereqarfik inuusuttunut taakkununnga ikiuuttoq eqqartuussissuserisullu marluk attavigineqartut oqaatigineqarpoq. Norgemiut marluk taakkua pisuunnginnerarput. Inuinukua arlallit sakkulisaartut biilimik ingerlatitsisumik inuartut, oqarput. Inuusuttut marluusut tamarmik Norgemi illersornissaqarfimmi sakkutuujunermik isumannaallisaanermillu suliffeqarfimmi namminersortumi sulisimanermik tunuliaqutaqarput.