Norskit ajugaaqqipput
Arnat qangatoorlugu 10 kilometerimut unammineranni sekundi kingulleq tikillugu pissanganeqarpoq unammineq Oslomi sisorartarfissuarmi tusaamasaasumi Holmenkollenimi ingerlanneqarmat. Marit Bjørgen nunarsuarmi pissartannngorpoq Polenimiu Justyna Kowalczyk sekundinik sisamaannarnik qaangerlugu. Marit Bjørgenip atorpai 27,39 minutter.
Niviaq Chemnitz Berthelsen peqataasunit 67-iusunit normu 63-nngorpoq ajugaasumit minutsinik arfineq pingasungajannik kigaannerulluni.
Norskit nammineq unammisarfimminni VMqataanerminni angusarissaarput sapaammi anngutit 15 kilometerit marloriarlugit unamminermi Petter Northug ajugaalluni. Tassani qallunaani Jonas Thor Olsen kaajallannermik ataatsimik qaangertikkami unamminerup sinnera peqataasinnaajunnaarsitaavoq.
Tullianik Niviaq Chemnitz Berthelsen unammissaaq arfininngorneq martsip tallimaat arnat 30 kilometerimut unammilerpata.