Norsaq utiinnartoq

Air Greenland nalunaarpoq, Norsaq Kangerlussuarmiit nalunaaqutaq ataatsimut aallarami minutsini 15-ini ingerlareerluni ippassaq utiinnartariaqarsimasoq, nalunaaqutarlu marlup qeqqata missaani Kangerlussuarmut nunnittariaqarsimasoq.
Allattoq Jokum Nielsen
novembarip 28-at 2007 06:50

Utiinnartariaqarneq pissuteqarpoq timmisartup nalunaarsuutai kukkusumik takutitsimmata. Nalunaarsuutip takutissimagaluarpaa ilaasut inaanni naqitsineq appasippallaarsimasoq, naak taamanngikkaluartoq.

Timmisartoq ajoquteqavinngikkaluartoq malittarisassat naapertorlugit pisariaqarmat timmisartumik ingerlatsisoq aalajangerpoq Kangerlussuarmut utertariaqarlutik.

Norsaq Kangerlussuarmit unnuaq ataatsimut aallarpoq Københavnimullu ullaaq nalunaaqutaq qulinut nunnilluni.