Norsaq missinnaannginnami Islandimut unnuiartortariaqarpoq
Air Greenlandip timmisartorsua “Norsaq” aamma ullumikkut Kangerlussuarmi mittarfiup quasappallaarnera pissutigalugu missinnaanngilaq. Mittarfik miffigineqarsinnaanngoraluartoq sakkortuumik anorlilermat timmisartorsuaq Islandimi Keflavikimut mikkiartuinnartariaqarpoq, ilaasullu 212-iusut Islandimi unnueqqaartariaqassapput.
Allattoq Louise M. Kleemann
Norsaq aqagu ullaakkut Kangerlussualiarluni misileeqqissaaq pilersaarutillu najoqqutaralugit maani nalunaaqutaq 8.20-nngorpat apuunnissaa naatsorsuutigineqarluni.
Tamatuma kingornagut Norsaq Københavniliassaaq, ataasinngornermi ilaasussaagaluit ilaasoralugit.
Timmisartorsuup marlunngornermi timmisartuussinissaralua Air Greenlandip timmisartorsuanit allamit “Kunuunnguamit” Boeing 757-imit ingerlanneqassaaq.
Ullumikkut ullup sinnerani Nuummut timmisartuussinissat taamaatiinnarneqartut, Air Greenlandimit nalunaarutigineqarpoq.