Air Greenlandip timmisartorsua ”Norsaq” Amerikap Avannaani illoqarfissuarmut Baltimoremut nalunaaquttap akunnerisa marlussuit matuma siorna pernaammik nunnippoq. Baltimore tassaavoq Air Greenlandip aappaagu maajip ulluisa 25-anniit ornittaligassaa.
Kangerlussuarmiit Baltimore-p tungaanut ullumikkut timmisartorneq nalunaaquttap akunnernik tallimanik sivisussuseqarpoq, unalu angalaneq sioqqutsilluni angalaneruvoq, timmisartorsuarmilu USA-liartumi issimasut 81-iupput. Issimasunit taakkunannga 28-t New Yorkimi sapaatip akunnerata naanerani marathonernissamut peqataajartorput, sinneri tassaanerullutik takornarniaqarnermik suliallit, tusagassiortut Air Greenlandimilu sulisut.
Kalaallit Nunaanniit Norsamut ilaasut Baltimorep timmisartoqarfissuani massakkorpiaq tikilluaqquneqarput, utimut ilaasussat 75-it nalunaaquttap akunneri marlussuit qaangiuppata Kalaallit Nunaannukartussat aamma peqataallutik.
Taakku 75-it, tassaapput takornarnianik angallassisartut, takornarniaqartitsinermik suliallit, taavalu USA-mi Canadamilu tusagassiortut.
Taakku nunatsinni sapaatip akunnera ataaseq misigisassarsiussapput, aqqusaassallugit Ilulissat, Sisimiut aamma Nuuk, USA-mullu utissapput sisamanngorpat tulliani, taakkunannga Air Greenland qaaqqusisuuvoq.
Kangerlussuarmi nuianera unnugu qaangiutissasoq,
Air Greenlandip neriuutigaa, qaaqqusat arsarnernik kusanartunik isiginnaarniassammata.
Norsaq unnuaru unnuap-qeqqata missaani Kangerlussuarmiit Københavnip tungaanut ingerlaqqissaaq.