Norilsk Ruslandip Issittumi illoqarfiini pingaarnersaaniartoq
Ruslandip qiterpasissuani illoqarfik Norilsk, Ruslandip Issittumi illoqarfiisa pingaarnersaattut inissisimalersinnaavoq.
Aviisi The Independent Barents Observer nittartakkamini taama allaaserisaqarpoq.
Norilskip Issittumi pingaarutilittut inissisimalernissaa anguniagaavoq, mingutsitsinerujussuarlu salillugu inuussutissarsiortunut pilerinartunngortinneqarnissaa sulissutiginiarneqarluni.
Norilsk 1930-kkunni pilersinneqarpoq, parnaarussat Norilskip nalaani kanngussamik nikkelimillu piiaavinni pinngitsaalisaassummik sulisinneqartut illoqarfimmik pilersitsisuullutik. Tamaani ississinnaasorujussuuvoq.
Mingutsitsinerpaat ilaat
Norilsk Issittumi illoqarfiit annerit ilaanniippoq, nunarsuarmilu mingutsitsiffiunerpaat ilaattut taaneqartarluni, soorlu silaannaq mingutsinneqaqalunilu tamaani kuussuit uuliakoorfigineqaqalutik.
Tamannali guvernørip Aleksandr Ussip oqaluttuaannanngortinniarneqarpaa, Norilsk pilersaarusiorluarnikkut inuussutissarsiortunut pilerinarnerulersinniarneqarluni.
Aningaasat milliardilikkaat tassunga atorneqarnissaat naatsorsuutigineqarpoq, tamaanili oqartussat Ruslandimilu oqartussat aningaasaliinerisigut Norilsk ineriartortinniarneqarpoq, soorlu aamma nunarsuarmi nikkelimik piiaasut annerpaartaata Nornickelip aningaasaleeqataasinnaanera siunnersuutigineqartoq.
Norilskili imaaliallaannarluni Ruslandip Issittumi illoqarfiisa pingaarnersaattut inissisimalersinnaagunanngilaq, illoqarfiimmi Arkhangelsk Murmanskilu Ruslandip Issittumi illoqarfiisa pingaarnersaattut aamma piukkoormata.
